Hetimi i ri për vrasjen e Pasolinit
Romë, 2 nëntor 2026 (ATSH) – Prokuroria e Romës ka filluar një hetim të ri për vrasjen e shkrimtarit dhe regjisorit italian Pier Paolo Pasolini, në 51-vjetorin e vdekjes së tij. Dosja e re i është caktuar prokurores Silvia Santucci, pas një kërkese të dorëzuar nga avokati Stefano Maccioni.
Pasolini u vra natën midis 1 dhe 2 nëntorit 1975, në Ostia, afër Romës. Rrethanat e vdekjes së tij kanë mbetur për dekada një nga temat më të diskutuara të historisë italiane të periudhës së pasluftës.
Sipas avokatit Maccioni, kërkesa për hetime të reja, e paraqitur në nëntor 2025 dhe plotësuar në maj 2026, bazohet në elemente të reja të grumbulluara nga mbrojtja. Ai shprehu kënaqësi për vendimin e Prokurorisë dhe shpresoi që hetimet do të ndihmojnë në sqarimin e plotë të ngjarjes.
Në deklaratën e tij, avokati u bëri thirrje atyre që mund të kenë informacion për rrethanat e vrasjes, por që deri tani kanë qëndruar në heshtje, të dalin përpara dhe të japin dëshmi.
Dënimi i Pino Pelosit dhe kërkesat e mëparshme
Për vrasjen u dënua Giuseppe “Pino” Pelosi, i cili ishte 17 vjeç në kohën e ngjarjes. Vendimi gjyqësor i formës së prerë e konfirmoi përgjegjësinë e tij, ndërsa hipotezat për përfshirjen e personave të tjerë kanë vazhduar të nxisin debate dhe kërkesa për hetime të mëtejshme.
Kërkesat e mëparshme për rihapjen e hetimeve, të paraqitura në vitet 2016 dhe 2023, ishin refuzuar nga autoritetet. Hapja e dosjes së re synon të shqyrtojë elementet e paraqitura së fundmi dhe të hedhë më shumë dritë mbi një vrasje që vazhdon të ngjallë pyetje edhe pas më shumë se gjysmë shekulli.
Pasolini, një nga figurat më të rëndësishme të kulturës italiane të shekullit XX, ishte shkrimtar, poet, regjisor dhe intelektual i njohur për veprën e tij artistike dhe për qëndrimet e tij kritike ndaj shoqërisë.
Burimi: ata.gov.al
