Avokati Sokol Hazizaj thotë se pas ndryshimeve kushtetuese të vitit 2016, gjykatat dhe prokuroritë në vend janë nën monitorim ndërkombëtar.
Në emisionin “Real Story” në ABC News, Hazizaj tha se mënyra si diskutohet për një reformë të dytë në drejtësi është pa logjikë dhe pa bazë të duhur kushtetuese e ligjore.
Monitorimi ndërkombëtar dhe SPAK
Sipas tij, ligji për organet e posaçme të vitit 2016, sidomos neni 14, tregon që SPAK-u është nën monitorim, po ashtu edhe gjykata. “Mjafton të shikosh ligjin për organet e posaçme, neni 14, që SPAK-u reflekton. Dihet që SPAK-u është nën monitorim dhe gjykata monitorohet nga ndërkombëtarë”, tha ai. Ai pyeti nëse ka nevojë për “reformë të reformës”.
Harta gjyqësore dhe shërbimi ndaj qytetarit
Hazizaj tha se mund të ketë nevojë për korrigjimin e hartës gjyqësore. Ai iu referua kërkesave të kryetarit të KLGJ-së dhe të KLP-së në Kuvend për buxhet dhe ambiente, duke pyetur nëse harta gjyqësore duhet të ndryshohet. Sipas tij, qëllimi i reformës së vitit 2016 ishte shërbimi ndaj qytetarit, ndërsa, sipas tij, debati aktual tregon se “këta duan t’i shërbejnë vetes”.
“Monitoruesi nuk gabon. Do jetë reformë në shërbim të qytetarëve”, përfundoi ai.
/abcnews.al
Burimi: abcnews.al
