Ministri i Jashtëm italian Antonio Tajani ka denoncuar kërcënime të reja nga hakerat, këtë herë të drejtuara kundër anëtarëve të familjes së tij. Ai ka folur sot në Parlamentin e Romës.
“Edhe unë u bëra cak i hakerave, të cilët premtuan gjithashtu shpërblime financiare. Sot mora kërcënime të mëtejshme që përfshinin të gjithë anëtarët e familjes sime, përfshirë fëmijët e mitur”, tha Tajani.
Të dhënat personale dhe premtimi për shpërblim
Javët e fundit, grupi pro-rus NoName057(16) publikoi në internet të dhëna personale të kreut të diplomacisë italiane. Grupi shtoi se do t’i paguante me kriptovaluta çdo personi që do t’i jepte informacione të mëtejshme.
Lidhja me mbështetjen për Ukrainën
Ministri i Jashtëm italian deklaroi se këto kërcënime lidhen me mbështetjen që ai dhe qeveria Meloni në tërësi vazhdojnë t’i ofrojnë Ukrainës.
Burimi: euronews.al
