Ministri i Drejtësisë, Toni Gogu, dhe homologu i tij italian, Carlo Nordio, zhvilluan sot në Romë një takim me fokus forcimin e bashkëpunimit dypalësh në fushën e drejtësisë dhe mbështetjen e Italisë si partner strategjik i Shqipërisë në rrugën drejt integrimit evropian. Italia është partneri kryesor i Shqipërisë në bashkëpunimin gjyqësor në çështjet penale.
Mirënjohja e Shqipërisë dhe roli i Italisë
Gjatë takimit, Ministri Gogu shprehu mirënjohjen për mbështetjen e vazhdueshme të Italisë në procese të rëndësishme të sistemit të drejtësisë, veçanërisht për ndihmën në përgatitjen e paketës së ndryshimeve në Kodin e Procedurës Penale dhe të paketave të tjera ligjore. Ai vlerësoi rolin e Italisë si partner strategjik në rrugën e Shqipërisë drejt anëtarësimit në Bashkimin Evropian, si dhe rëndësinë e zgjerimit të bashkëpunimit në fusha të tjera në të ardhmen.
Ministri italian i Drejtësisë, Carlo Nordio, theksoi se marrëdhëniet dypalëshe mes Shqipërisë dhe Italisë janë aktualisht në nivelin më të lartë dhe shprehu angazhimin për të punuar në konsolidimin e mëtejshëm të raporteve mes dy vendeve.
Reforma penale dhe trajnimi
Ministrat diskutuan gjithashtu bashkëpunimin për reformën e legjislacionit penal, trajnimin e Policisë së Burgjeve dhe lidhjet mes Shkollave të Magjistraturës të dy vendeve, me pjesëmarrjen e Presidentit të Shkollës italiane, Mauro Paladini.
Burimi: tirananews.al
