Tragjedi në futbollin francez: vdekja e Wanis Honsor
Futbollisti i ri francez Wanis Honsor ka ndërruar jetë në moshën vetëm 22 vjeç, pasi pësoi një arrest kardiak gjatë një seance stërvitore me skuadrën e tij, Saint-Denis FC. Lajmi ka tronditur futbollin francez.
Rrëzimi në fushë dhe përpjekjet për ta shpëtuar
Mbrojtësi u rrëzua papritur në fushë, duke krijuar alarm te shokët e skuadrës dhe stafi teknik. Personeli mjekësor ndërhyri menjëherë dhe bëri gjithçka e mundur për ta rikthyer në jetë, por përpjekjet për reanimim nuk patën sukses.
Reagimi i klubeve dhe kujtimi i karrierës
Lajmi për vdekjen e tij ka prekur thellë edhe FC Rouen, klubin ku Honsor bëri hapat e parë në futboll dhe u formua si lojtar. Me ekipin e parë të Rouen ai regjistroi tri paraqitje gjatë sezonit 2023-2024 dhe shënoi edhe një gol.
Klubi francez reagoi zyrtarisht me një mesazh prekës, ku shprehu trishtimin për humbjen e parakohshme të ish-futbollistit të tij. “FC Rouen 1899 mësoi këtë mëngjes me trishtim të madh për ndarjen e parakohshme nga jeta të Wanis Honsor, i cili pësoi një arrest kardiak gjatë një seance stërvitore me klubin e tij Saint-Denis FC”, thuhej në njoftimin e klubit.
Një jetë e ndërprerë shumë herët dhe një humbje e rëndë për familjen, miqtë, shokët e skuadrës dhe të gjithë ata që e njohën të riun 22-vjeçar.
Burimi: tirananews.al
