Rishikimi i vendeve që u ndahen klubeve në kompeticionet e UEFA-s mund t’u ofrojë skuadrave shqiptare një mundësi më të mirë në edicionin e ardhshëm.
Ndikim në këtë drejtim kanë dhënë pikët e grumbulluara nga klubet shqiptare në Europë, veçanërisht paraqitja e Egnatias në fazën e grupeve të Conference League. Kjo mund të përmirësojë pozicionin e Shqipërisë në skemën e kualifikimit.
Ndikimi i rezultateve europiane
Nëse UEFA vazhdon ta përjashtojë Rusinë nga garat europiane, fituesi i Kupës së Shqipërisë ka shumë gjasa të sigurojë pjesëmarrjen e drejtpërdrejtë në raundin e dytë të Conference League.
Kështu, Kupa e Shqipërisë merr peshë të shtuar: përveç trofeut, klubet synojnë edhe mijëra euro nga UEFA, si dhe një mundësi më të mirë për të avancuar në Europë.
Rregulli kur kampion dhe fitues i Kupës është i njëjti klub
Në rast se i njëjti klub shpallet kampion dhe fiton Kupën e Shqipërisë, përfitimi i këtij privilegji i kalon skuadrës që e përfundon kampionatin në vendin e dytë në Superiore.
Burimi: www.albeu.com
