Pas përfundimit të pushimit të fundit të Kombëtareve për vitin 2026, Barcelona do t’i rikthehet aksionit të dielën pasdite.
Ndeshja e parë e katalunasve pas këtij pushimi do të jetë përballja me Villarrealin në “Spotify Camp Nou”, në kuadër të javës së 13-të të La Ligës.
Garë për vendin e parë
Para kësaj ndeshjeje, Barcelona ka një epërsi prej tri pikësh ndaj Real Madridit, që renditet në vendin e dytë në tabelë.
Megjithatë, meqenëse “Los Blancos” do të përballen të shtunën me Celta Vigon, ata kanë mundësinë të barazohen me pikë me Barcelonën në rast fitoreje. Kjo e bën edhe më të rëndësishme që skuadra e Hansi Flickut të marrë tri pikët të dielën.
Siç ka vënë në pah gazeta “AS”, Barcelona nuk ka humbur asnjë ndeshje të parë pas pushimeve të Kombëtareve që prej momentit kur Hansi Flick mori drejtimin e skuadrës në vitin 2024.
Sfida e pushimeve të Kombëtareve
Ndeshjet e Kombëtareve shpesh krijojnë probleme për trajnerët e klubeve, të cilët për disa ditë mbesin pa një numër të madh futbollistësh të ekipit të parë. Udhëtimet, minutat e grumbulluara dhe rreziku nga lëndimet mund të ndikojnë në përgatitjet për rikthimin në garat vendore.
Megjithatë, Flick deri më tani ka arritur ta mbajë Barcelonën në nivel të lartë, pavarësisht këtyre ndërprerjeve.
Seria e fitoreve të Flickut
Trajneri gjerman i ka udhëhequr katalunasit në nëntë ndeshje menjëherë pas përfundimit të pushimeve të Kombëtareve, pa pësuar asnjë humbje. Në këto përballje, Barcelona ka regjistruar tetë fitore dhe një barazim.
Në mesin e këtyre rezultateve janë edhe disa fitore bindëse, si ndaj Gironës (4-1), Osasunës (3-0), Valencias (6-0), Gironës (2-1), Athletic Bilbaos (4-0) dhe Atletico Madridit (2-1). Fitorja më e fundit në këtë seri ishte ajo 3-0 ndaj Getafes muajin e kaluar.
E vetmja ndeshje në të cilën Barcelona ka humbur pikë menjëherë pas një pushimi të Kombëtareve ishte në nëntor të vitit 2024, kur barazoi 2-2 me Celta Vigon.
Tani, Barcelona ka mundësinë ta regjistrojë fitoren e nëntë në dhjetë ndeshje të tilla, nëse triumfon ndaj Villarrealit të dielën në “Spotify Camp Nou”.
Seria më e gjatë pa humbje
Interesant është fakti se seria pozitive e Barcelonës në ndeshjet menjëherë pas pushimeve të Kombëtareve daton shumë më herët sesa ardhja e Flickut në verën e vitit 2024.
Humbja e fundit e katalunasve menjëherë pas një pushimi të Kombëtareve daton më 14 shtator 2021, kur skuadra e drejtuar nga Ronald Koeman u mposht 3-0 nga Bayern Munichu në “Spotify Camp Nou”, në kuadër të Ligës së Kampionëve.
Që nga ajo kohë, Barcelona nuk ka pësuar humbje në ndeshjet e para pas pushimeve të Kombëtareve, me këtë seri që ka vazhduar fillimisht nën drejtimin e Xavi Hernandezit dhe tani me Hansi Flickun.
Përballja me Villarrealin
Kampionët e La Ligës do të synojnë ta vazhdojnë këtë ecuri pozitive edhe ndaj Villarrealit të dielën.
Megjithatë, kjo nuk do të jetë aspak e lehtë, pasi “Nëndetësja e Verdhë” ka fituar tri nga pesë ndeshjet e fundit si mysafire ndaj Barcelonës në kampionat./GazetaExpress/
Burimi: www.gazetaexpress.com










