Antonio Conte zbulon se si bashkëshortja e tij përgatiti makarona për John Terryn dhe ndryshoi rrjedhën e karrierës së tij te Chelsea: “Klubi nuk kishte ndërmend t’ia rinovonte kontratën, madje as që përmendej emri i tij”.
Trajneri italian, Antonio Conte, ka zbuluar një histori interesante nga koha e tij te Chelsea, duke treguar se si një darkë me makarona e përgatitur nga bashkëshortja e tij luajti një rol të rëndësishëm në vazhdimin e karrierës së John Terryt në klubin londinez.
Takimi në Torino
Conte ishte i ftuar në podcastin “Cronache di Spogliatoio”, ku rikujtoi përvojën e tij të gjatë në Itali dhe Angli, përfshirë fitimin e titullit të Premierligës dhe Kupës FA me Chelsean në periudhën 2016-2018.
Ai tregoi se karriera e Terryt mund të kishte marrë një drejtim krejtësisht tjetër, pasi mbrojtësi anglez ishte shumë pranë largimit nga klubi, përpara se të shndërrohej në një nga figurat më legjendare të tij.
“Terry ishte një figurë thelbësore në triumfin tonë në Premierligë. Ishte një djalë i jashtëzakonshëm. Ai udhëtoi me aeroplan privat, së bashku me agjentin e tij, nga Londra në Torino për të më takuar. Kontrata e tij po i afrohej fundit dhe ai vendosi ta paguante vetë udhëtimin për të ardhur të më takonte.
“Në thelb, më tha se e donte jashtëzakonisht shumë Chelsean dhe dëshironte të vazhdonte të luante aty. Deri në atë ditë, ne nuk kishim folur asnjëherë për Terryn. Marina Abramovich më tregoi se ai dëshironte të vinte për të biseduar me mua, por klubi nuk kishte ndërmend t’ia rinovonte kontratën.
Darka me makarona
“Bashkëshortja ime përfundoi duke përgatitur makarona për John Terryn dhe agjentin e tij, të cilin nuk e kisha takuar më parë. Unë e sigurova se nuk më interesonte mosha e tij, por nëse gjatë stërvitjeve dëshmonte se e meritonte të luante, atëherë do ta aktivizoja.
“Premtimi i vetëm që duhej të më bënte ishte se edhe nëse nuk luante, do të vazhdonte të ishte një vlerë e shtuar në zhveshtore, sepse ai përfaqësonte historinë e këtij klubi”, tregoi Conte.
Në atë kohë, Terry ishte 35-vjeçar dhe, sipas Contes, Chelsea nuk kishte as interesimin më të vogël për ta mbajtur në skuadër, duke qenë i gatshëm ta linte të largohej si lojtar i lirë.
“Ai thjesht nuk përmendej fare. Ishte sezoni kur Chelsea e përfundoi kampionatin në vendin e dhjetë. Unë i kisha takuar të gjithë lojtarët e Chelseat një muaj më herët, por nuk më lejuan ta takoja Terryn, sepse ai nuk ishte fare në planet e tyre”, shtoi trajneri italian.
Zëri i lojtarëve në zhveshtore
Conte zbuloi gjithashtu se Terry ishte ai që përfaqësonte zërin e futbollistëve në zhveshtore, madje duke i përcjellë edhe pakënaqësitë e tyre për mënyrën shumë taktike të punës së trajnerit italian, e cila në atë kohë ishte e pazakontë për lojtarët e Premierligës.
“Një ditë, gjatë stërvitjes, Terry erdhi tek unë dhe më tha se lojtarët mendonin se po bënim shumë punë taktike dhe po shikonim tepër shumë video. Kur kapiteni im vjen dhe më thotë diçka të tillë, unë duhet të flas me stafin dhe të mundohem të përshtatem me kërkesat e tyre.
“Mund të jetë rastësi, por pas kësaj barazuam me Swansea dhe humbëm nga Arsenali. Atëherë mendova se po ktheheshim prapa në mënyrën time të punës. Nëse duhet të vdesim, atëherë do të vdesim me idetë e mia”, insistoi Conte.
Sipas tij, situata në zhveshtore ishte tensionuar dhe lojtarët ishin pranë rebelimit, por gjithçka ndryshoi pas një tjetër pushimi.
“Zhveshtorja po ziente dhe lojtarët ishin gati të revoltoheshin, por pas një tjetër pushimi, Terry erdhi sërish tek unë.
‘Trajner, duhet të vazhdojmë me punën taktike, sepse këto gjëra po ndodhin vërtet gjatë ndeshjeve!’
Ata e kuptuan se ai nuk po na tregonte gjëra pa arsye. Ishin situata që realisht po i shihnim në ndeshje dhe kjo ndryshoi gjithçka”, përfundoi Conte./GazetaExpress/
Burimi: www.gazetaexpress.com










