Pas 28 vitesh në rrugë, Karl Bushby ka përfunduar më në fund një nga udhëtimet më të jashtëzakonshme në botë. Aventurieri britanik, i cili u nis në vitin 1998 nga Kili me synimin për t’u kthyer në shtëpinë e tij në Angli pa përdorur asnjë mjet transporti, mbërriti të hënën në Hull, duke përshkuar rreth 50 mijë kilometra në këmbë.
Kur nisi këtë sfidë, më 1 nëntor 1998, Bushby ishte vetëm 29 vjeç dhe kishte me vete një tendë, disa qindra dollarë dhe një aparat fotografik plastik. Plani fillestar ishte që udhëtimi të zgjaste rreth 10-12 vite, por pengesat e shumta e kthyen atë në një aventurë që zgjati plot 28 vite.
Rregullat e tij ishin të qarta: të mos përdorte asnjë mjet transporti për të përparuar drejt destinacionit dhe të mos kthehej në shtëpi pa e përfunduar sfidën.
Rruga nëpër pesë kontinente
Gjatë gjithë këtyre viteve, ai përshkoi Amerikën e Veriut dhe atë të Jugut, kaloi Ngushticën e ngrirë të Beringut nga Alaska drejt Rusisë dhe vazhdoi përmes Azisë Qendrore dhe Europës. Në rrugëtimin e tij u përball me xhungla, male, shkretëtira dhe kushte ekstreme atmosferike.
Megjithatë, jo çdo pengesë ishte natyrore. Bushby u përball me një arrestim të shkurtër në Panama, u kërcënua me armë në Meksikë dhe u ndalua nga autoritetet ruse pasi kaloi ilegalisht kufirin. Për disa periudha, iu desh të ndërpriste udhëtimin, veçanërisht kur Rusia i refuzoi vizën. Kriza financiare e vitit 2008 dhe pandemia e COVID-19 ishin gjithashtu ndër arsyet që e detyruan të ndalonte përkohësisht.
Por ai nuk hoqi dorë. Sa herë që rrethanat e lejonin, kthehej pikërisht në vendin ku kishte ndërprerë rrugëtimin dhe vazhdonte nga aty. Në fillim të tetorit, Bushby kaloi me not Kanalin Anglez për t’u rikthyer në Mbretërinë e Bashkuar dhe për të përmbyllur sfidën e tij.
Mbërritja në Hull
Të dielën, ai kaloi urën ikonike Humber pranë Hull-it, mes mjegullës së dendur, ndërsa të hënën mbërriti në qendër të qytetit, ku u prit nga rreth 1,000 persona që kishin dalë për ta përshëndetur. Në këtë moment të veçantë, 57-vjeçari falënderoi të gjithë ata që e kishin mbështetur gjatë rrugëtimit.
“Unë nuk e bëra këtë i vetëm. Ishte një përpjekje globale”, u shpreh ai, duke treguar se pas këtij udhëtimi qëndronin shumë njerëz që e kishin ndihmuar të kapërcente pengesat dhe vështirësitë.
Pritja më emocionuese e priste në shtëpi. Pas 28 vitesh, Bushby u ribashkua me nënën e tij, Angela, ndërsa e prisnin edhe djali 36-vjeçar, Adam, dhe mbesa 12-vjeçare, të cilën nuk e kishte takuar kurrë më parë. Nëna e tij kishte mundur ta shihte vetëm tri herë që nga nisja e aventurës.
“Është një ndjesi e mrekullueshme të kem sërish tokën britanike nën këmbët e mia pas gjithë këtyre viteve”, u shpreh ai, duke pranuar se rrugëtimi nuk kishte qenë aspak i lehtë.
Një dokumentar dhe sfida e rikthimit
Historia e tij ka tërhequr edhe vëmendjen e regjisorit të njohur gjerman Werner Herzog, i cili së bashku me një ekip filmik e ka shoqëruar Bushby-n në kthimin e tij në shtëpi. Herzog po realizon një dokumentar artistik me metrazh të gjatë, të titulluar “Walk of Life”, për këtë udhëtim. Kompania e prodhimit e ka mbështetur aventurierin financiarisht dhe logjistikisht gjatë 16 viteve të fundit.
Pas përfundimit të sfidës, Bushby përballet tashmë me një tjetër ndryshim: rikthimin në jetën e zakonshme. Në një intervistë të dhënë në shtator, ai pranoi se kishte pak shqetësim për këtë etapë të re, pasi do t’i duhej të përshtatej sërish me një jetë larg rrugëve.
“Duhet të përpiqem të gjej sërish vendin tim në botën e të rriturve”, ishte shprehur ai.
Megjithatë, pas 28 vitesh, 50 mijë kilometrash dhe mijëra pengesash, mesazhi i tij mbetet i thjeshtë: “Të gjithë ne mund të arrijmë shumë më tepër nga sa e imagjinojmë ndonjëherë.”
