Deputeti i Partisë Demokratike, Saimir Korreshi, ka reaguar me kritika ndaj deklaratave të komisioneres europiane për Zgjerimin, Marta Kos, lidhur me Shqipërinë dhe ecurinë e procesit të integrimit europian. Ai u ndal veçanërisht te rasti i Belinda Ballukut, duke pretenduar se, pavarësisht akuzave dhe dyshimeve për dëme të konsiderueshme ndaj buxhetit të shtetit, ajo vazhdon të jetë e lirë. Për të ilustruar atë që e cilësoi si standard të dyfishtë të drejtësisë, Korreshi bëri një krahasim me qytetarët që përfundojnë në burg për çështje shumë më të vogla.
“Shoqja Kos nuk citon që Balluku me 1 miliard euro dëme ndaj buxhetit të shtetit, me vila e apartamente, rri e lirë, ndërsa një që ndërton çati është në burg”, deklaroi Korreshi.
Kritika për drejtësinë dhe dhunën ndaj protestuesve
Ai kritikoi gjithashtu mungesën e vëmendjes ndaj situatës së Erion Veliajt dhe pretendimeve për kërcënime ndaj tij, si dhe ndaj rasteve të dhunës së ushtruar ndaj protestuesve.
“Nuk përmend faktin se çfarë ndodhi me Veliajn apo kërcënimet ndaj tij, për të cilat nuk u fol nga asnjë faktor i drejtësisë. As për ata që dhunuan protestuesit me shkopinj gome, shoqja Kos nuk tha asgjë”, u shpreh deputeti.
Gjendja ekonomike e qytetarëve
Një tjetër çështje e ngritur prej tij ishte gjendja ekonomike e qytetarëve, për të cilën Korreshi tha se mbetet larg realitetit që pasqyrohet në diskutimet politike për integrimin europian. “Nuk foli as për faktin se njerëzit këtu ende e llogarisin bukën me ndihmën ekonomike që marrin. Nuk u del as për të blerë një bukë në ditë”, tha ai.
Dialogu politik dhe roli i kryeministrit
Korreshi vuri në pikëpyetje edhe thirrjet për dialog politik me kryeministrin Edi Rama, duke pretenduar se vendimmarrja në vend është e përqendruar në duart e këtij të fundit. “Çfarë dialogu mund të ketë kur çdo gjë këtu vendoset sipas asaj që do komandanti? Këtu edhe presidenti është si portier që hap e mbyll derën. Për çfarë po flet shoqja Kos?”, përfundoi deputeti i PD-së.
Burimi: kohajone.com
