Dymbëdhjetë organizata të industrisë audiovizuale në Korenë e Jugut kanë paralajmëruar se baza e prodhimit të dramave televizive në vend po përballet me një rrezik serioz. Ato i kanë bërë thirrje qeverisë të krijojë një fond investimi prej 1 trilion wonësh, rreth 746 milionë dollarë, për të mbështetur prodhimin e serialeve të njohura si K-drama.
Rënia e numrit të prodhimeve
Dramat koreane kanë fituar popullaritet të madh në mbarë botën, por numri i tyre ka shënuar rënie gjatë viteve të fundit. Sipas të dhënave të Korea IR Service, nga 141 tituj të prodhuar në vitin 2022, numri ka rënë në rreth 115 në vitin 2025.
Rënia është edhe më e theksuar te televizionet vendore. Tri rrjetet kryesore televizive në Korenë e Jugut e kanë zvogëluar prodhimin e dramave nga 91 tituj në vitin 2012, në vetëm 32 në vitin 2023. Disa kanale madje kanë ndërprerë transmetimin e serialeve gjatë ditëve të javës.
Pasojat për talentet e reja
Song Byeong-joon, kryetar i Shoqatës së Prodhuesve të Dramave të Koresë, ka paralajmëruar se kjo situatë po i vështirëson mundësitë për zhvillimin e talenteve të reja në industri. Sipas tij, në këtë mjedis bëhet gjithnjë e më e vështirë që një skenarist i ri të realizojë veprën e dytë, që një aktor në rol dytësor të marrë rolin kryesor, apo që një asistent i produksionit të debutojë si regjisor.
Arsyet e rënies
Organizatat, që përfaqësojnë producentë, regjisorë, skenaristë, aktorë, operatorë dhe punonjës të tjerë të industrisë, ia atribuojnë këtë rënie rritjes së kostove të produksionit, konkurrencës me platformat globale të transmetimit, si Netflix, si dhe zvogëlimit të kapaciteteve investuese të televizioneve.
Një sfidë tjetër është konkurrenca me përmbajtjet e shkurtra dhe përdorimi në rritje i inteligjencës artificiale, të cilat po ndryshojnë mënyrën se si publiku konsumon përmbajtje audiovizuale.
Sipas një raporti të Korea IR Service të vitit 2025, një nga faktorët kryesorë që rrisin kostot e produksionit janë honorarët e aktorëve kryesorë. Ato janë rritur si pasojë e konkurrencës mes platformave të transmetimit për të angazhuar emrat më tërheqës për publikun.
Një pamje më e gjerë e sektorit
Megjithatë, profesori i administrimit të biznesit në Universitetin Sun Moon, Kim Yong-hee, vlerëson se vështirësitë e përmendura nga organizatat pasqyrojnë kryesisht rënien e televizioneve tradicionale, dhe jo domosdoshmërisht të gjithë sektorit audiovizual.
Të dhënat zyrtare tregojnë se punësimi në industrinë e përmbajtjes në Korenë e Jugut është rritur lehtë, nga 688.122 të punësuar në vitin 2024, në 693.090 në vitin 2025. Ndërkohë, punësimi në sektorin e transmetimeve televizive kishte shënuar rënie prej 2.3 për qind gjatë vitit 2024.
Netflix dhe investimet e huaja
Netflix, i cili hyri në tregun e Koresë së Jugut në vitin 2016, premtoi në vitin 2023 se do të investojë 2.5 miliardë dollarë në këtë treg brenda katër vjetësh. Megjithatë, përfaqësuesit e platformës nuk kanë dhënë ende një koment lidhur me kërkesën e organizatave të industrisë koreane./KultPlus.com
Burimi: kultplus.com
