Telefonat, tabletët dhe pajisjet e tjera digjitale janë bërë pjesë e përditshme e jetës së fëmijëve. Megjithatë, përdorimi i tyre për periudha të gjata mund të ndikojë në mënyrën se si fëmijët komunikojnë dhe ndërveprojnë me mjedisin rreth tyre.
Pasojat e qëndrimit të zgjatur para ekraneve
Terapistja e zhvillimit Irena Danjolli shpjegon pasojat që qëndrimi i zgjatur para ekraneve mund të ketë në zhvillimin e të folurit dhe të gjuhës, si dhe rastet që trajtohen në Kukës. Lajmin e bën të ditur rtsh.al, transmeton klankosova.tv.
Danjolli thotë se teknologjia mund të ndikojë ndjeshëm në zhvillimin gjuhësor, emocional, në komunikim dhe në lojën e fëmijëve. Sipas saj, vërehen shpesh vështirësi zhvillimore që lidhen me përdorimin e ekraneve.
Ndër shqetësimet që vënë re prindërit janë mungesa e të folurit dhe e ndërveprimit shoqëror, si dhe vështirësia për të krijuar miqësi, shprehet terapistja. Ajo përmend gjithashtu mungesën e kontaktit me sy, që mund të vihet re që në moshën nëntë muajshe, dhe mosreagimin kur fëmija thirret në emër, që mund të shfaqet që gjashtë muajsh.
Kur duhet kërkuar ndihma e specialistit
Nëse fëmija ka vështirësi të vazhdueshme në të folur, nuk arrin të kuptojë udhëzime të thjeshta, nuk komunikon në përputhje me moshën ose has pengesa në përqendrim e ndërveprim, këshillohet të kërkohet mendimi i një specialisti.
Prindërit mund të ndihmojnë duke vendosur një rutinë të qëndrueshme, duke kufizuar përdorimin e ekraneve dhe duke përfshirë fëmijën në veprimtari të përbashkëta.
Specialistët sugjerojnë që kohën para pajisjeve ta zënë lojërat, bisedat, leximi dhe aktivitete të tjera që nxisin komunikimin e ndërveprimin e drejtpërdrejtë me fëmijën.
Burimi: www.albeu.com
