Kalo te përmbajtja

Lajme të shpejta, të verifikuara dhe të paanshme

Lajm i fundit
Politikë

Kurti prezanton buxhetin prej 4,27 miliardë euro për 2027

Kurti prezanton buxhetin prej 4,27 miliardë euro për 2027
Foto: ata.gov.al

PRISHTINË, 19 nëntor /ATSH/ Kryeministri Albin Kurti ka paraqitur sot para deputetëve të Kuvendit të Kosovës projektligjin mbi ndarjet buxhetore për buxhetin e vitit 2027, i cili “peshon” 4,27 miliardë euro.

Rritja e buxhetit dhe qëllimet e tij

Gjatë prezantimit, Kurti tha se rritja e buxhetit është rezultat i performancës së të hyrave publike dhe zgjerimit të aktivitetit ekonomik, duke theksuar se projektbuxheti synon mbështetjen e qytetarëve dhe ruajtjen e qëndrueshmërisë së financave publike.

Ai bëri të ditur se projektbuxheti parasheh edhe rritjen e mbështetjes financiare për ekipet mbrojtëse të katër ish-udhëheqësve të Ushtrisë Çlirimtare të Kosovës, të cilët po përballen me procesin gjyqësor në Hagë.

Pagat, shtesat dhe investimet

Kryeministri u ndal edhe te politikat e pagave në sektorin publik, duke bërë të ditur se për vitin 2027 është paraparë pagesa e pagës së 13-të, ndërsa nga 1 korriku vlera e koeficientit të pagave do të rritet në 120 euro.

Kurti paralajmëroi gjithashtu dyfishimin gradual të shtesave për fëmijë, proces që do të realizohet në katër faza, me rritje prej 25 për qind, duke filluar nga 1 janari 2027.

Në pjesën e investimeve kapitale, Kurti theksoi se për herë të parë janë paraparë mbi një miliard euro për këtë kategori, me qëllim të zhvillimit dhe transformimit të infrastrukturës në vend.

Kompania kombëtare ajrore

Ai prezantoi edhe një nismë të re për themelimin e një kompanie kombëtare ajrore, e cila, sipas tij, synon zgjerimin e lidhjeve ajrore të Kosovës dhe krijimin e më shumë mundësive për udhëtim.

Projektbuxheti për vitin 2027 është miratuar nga Qeveria e Kosovës më 2 nëntor dhe është proceduar në Kuvend për shqyrtim dhe miratim. Ai është rreth 300 milionë euro më i lartë se buxheti fillestar 2026. /KosovaPress/

Burimi: ata.gov.al

Të fundit Të gjitha