Elon Musk po distancohet nga lëvizja MAGA dhe nga mbështetja e tij për Donald Trumpin, pasi republikanët pësuan humbje të mëdha në zgjedhjet e fundit. Miliarderi pranoi se ndihet i zhgënjyer nga qindra milionë dollarët që shpenzoi për të ndihmuar kandidatët republikanë të fitonin.
Gjatë një interviste, Musk deklaroi hapur se nuk e sheh veten pjesë të lëvizjes MAGA.
“Unë nuk jam MAGA”, tha Musk.
“Nuk jam i sigurt se çfarë do të thotë MAGA, por nuk mendoj se jam pjesë e saj, nëse kjo nënkupton bindje të verbër ndaj një grupi politikash të Partisë Republikane. Mendoj se të dyja partitë kanë anët e tyre pozitive dhe negative”, shtoi ai.
Shpenzimet në zgjedhje
Musk shpenzoi më shumë se 400 milionë dollarë për kandidatët republikanë të mbështetur nga Trump në zgjedhjet e nëntorit. Mbi 150 milionë dollarë shkuan për kandidatin për Senatin në Teksas, Ken Paxton, i cili humbi përballë demokratit James Talarico. Kjo ishte fitorja e parë e demokratëve në nivel shtetëror në Teksas pas më shumë se 30 vitesh.
I pyetur nëse do të ndryshonte diçka po të kishte mundësinë të kthehej pas në kohë, Musk pranoi se ndoshta do të kishte shpenzuar më pak para.
“Ndihem mjaft budalla që shpenzova kaq shumë para dhe nuk mora shumë në këmbim”, u shpreh ai, duke shtuar se zgjedhjet amerikane tregojnë se gjithçka nuk vendoset vetëm nga paratë.
Deklaratat e tij janë në kontrast të fortë me qëndrimin që ka mbajtur gjatë viteve të fundit.
Roli i tij në administratën Trump
Musk ishte ulur në rreshtin e parë gjatë inaugurimit të Trumpit dhe drejtoi për muaj të tërë Departamentin për Efikasitetin e Qeverisë (DOGE), duke u bërë një nga figurat më të rëndësishme të administratës.
Burimi: shqiptarja.com










