Kalo te përmbajtja

Lajme të shpejta, të verifikuara dhe të paanshme

Lajm i fundit
Të ndryshme

Parlamenti miraton paketën anti-dhunë për protestat

Parlamenti miraton paketën anti-dhunë për protestat
Foto: kohajone.com

Komisioni për Çështjet e Brendshme dhe Mbrojtjes miratoi me një votë kundër dhe një abstenim aktin normativ që parashikon ndryshime në ligjin për tubimet. Ndryshimet vendosin kufizime të reja për zhvillimin e protestave dhe masa ndëshkuese për shkelësit.

Synimet e ndryshimeve

Akti normativ synon të përcaktojë zona të mbrojtura pranë institucioneve, të forcojë masat ndaj pjesëmarrësve që shkelin rregullat dhe të parandalojë thirrjet për dhunë të shpërndara përmes rrjeteve sociale.

Zv/ministri i Punëve të Brendshme, Xhemal Qefalia, gjatë prezantimit të nismës në komision, renditi disa prej masave: “Krijimin e mundësisë që këto kufizime të përkohshme të mbrojnë institucionet. Zona të mbrojtura. Parandalimi i thirrjeve për dhunë në rrjetet sociale. Dokumentimi audiovizual i thirrjeve. Përshkallëzimi i gjobave”, deklaroi ai.

Kundërshtimi në komision

Opozita shprehu mbështetje për protestuesit, por diskutimet në komision u shoqëruan me pak kundërshtime. I vetmi deputet opozitar që mori fjalën, Isuf Çelaj, e cilësoi aktin normativ si një përpjekje të qeverisë për të frenuar protestat përmes sanksioneve financiare. “Qeveria po përdor gjobat e larta me qëllim si mjet frikësimi ndaj qytetarëve. Ne këtë do ta çojmë në Gjykatën Kushtetuese. Të jeni të sigurt që kjo do të anatemohet. Si kontrolloni rrjetet sociale pa një vendim gjykate? Ndërhyni në jetën private. Qeveria nuk mbahet me masa agresive. Nuk mbahet me zor karrigia”, u shpreh deputeti demokrat.

Të dhënat e Policisë

Drejtori i Rendit Publik, Agron Çeli, paraqiti në komision të dhëna mbi zbatimin e aktit normativ. Sipas tij, masat e ndërmarra kanë ndikuar në uljen e episodeve të dhunës gjatë tubimeve, si dhe në reduktimin e numrit të personave të maskuar në protesta.

Dëmshpërblimi i bizneseve

Përveç ndryshimeve në ligjin për tubimet, Komisioni miratoi edhe një akt normativ që parashikon dëmshpërblimin e bizneseve të vogla që kanë pësuar dëme gjatë protestave.

Miratimi i këtyre masave rikthen në vëmendje debatin mbi kufirin mes garantimit të rendit dhe sigurisë publike dhe respektimit të së drejtës kushtetuese të qytetarëve për t’u tubuar.

Burimi: kohajone.com

Të fundit Të gjitha