Komisioni për Nismat Qytetare, Bashkëpunimin dhe Mbikëqyrjen Institucionale ka kryer vizita monitoruese në Drejtorinë e Përgjithshme të Burgjeve, në Institucionin e Ekzekutimit të Vendimeve Penale nr. 313 në Tiranë, si dhe në Drejtorinë e Përgjithshme të Shërbimit të Provës.
Këto vizita u realizuan sipas kalendarit vjetor të mbikëqyrjes parlamentare për vitin 2026, me synim vlerësimin e zbatimit të legjislacionit në fushën penale dhe të funksionimit të institucioneve që janë përgjegjëse për ekzekutimin e vendimeve gjyqësore.
Mbipopullimi dhe kushtet në institucionet e ekzekutimit të vendimeve penale
Një nga çështjet kryesore që u trajtua ishte mbipopullimi në burgje dhe në paraburgime, si dhe shpërndarja e të dënuarve dhe e personave nën masën e sigurisë në përputhje me kapacitetet e institucioneve. Diskutimet u përqendruan gjithashtu te përmirësimi i kushteve të trajtimit, zbatimi i rekomandimeve të Kuvendit dhe të Bashkimit Evropian, si dhe ecuria e strategjive dhe e planeve të veprimit.
Gjatë vizitës në IEVP nr. 313, përfaqësuesit e komisionit shqyrtuan kushtet e akomodimit, infrastrukturën, standardet e higjienës dhe ofrimin e shërbimeve bazë. Në fokus ishin edhe aksesi në kujdesin shëndetësor dhe në ndihmën juridike, si dhe mundësitë që u ofrohen të burgosurve për të mbajtur kontakte me familjarët.
Një tjetër temë e diskutuar ishte nevoja për shtimin e personelit dhe të investimeve, si dhe krijimi i më shumë mundësive për aktivitete arsimore dhe rehabilituese. Po ashtu, u evidentua rëndësia e bashkëpunimit mes institucioneve për të shmangur vonesat në ekzekutimin e vendimeve penale dhe për të reduktuar kohëzgjatjen e qëndrimit në paraburgim.
Dënimet alternative dhe roli i Shërbimit të Provës
Vëmendje iu kushtua edhe dënimeve alternative dhe rolit të Shërbimit të Provës në mbikëqyrjen dhe mbështetjen e personave që vuajnë dënimin në komunitet. Gjatë diskutimeve u trajtuan vështirësitë në nisjen dhe ndjekjen e këtyre masave, ngarkesa e punës së punonjësve dhe bashkëpunimi me gjykatat, prokuroritë dhe institucionet e tjera mbështetëse.
Në këtë kuadër, u diskutua edhe për digjitalizimin dhe administrimin e të dhënave, përdorimin e mbikëqyrjes elektronike dhe vlerësimin e programeve të rehabilitimit e të riintegrimit, me synim parandalimin e përsëritjes së veprave penale.
Të dhënat e mbledhura gjatë vizitave do të përdoren për hartimin e raporteve dhe të rekomandimeve për institucionet përgjegjëse. Ky proces synon të forcojë kontrollin parlamentar mbi zbatimin e ligjeve dhe të kontribuojë në garantimin e të drejtave të personave të privuar nga liria, si dhe të atyre që janë nën mbikëqyrjen e Shërbimit të Provës.
Burimi: lajmifundit.al
