Arbnor Aliu është kthyer në një nga futbollistët më pozitivë të Llapit gjatë këtij edicioni, duke u dalluar me paraqitjet e tij edhe në një periudhë kur skuadra nuk ka arritur rezultatet e pritura.
Mbrojtësi 23-vjeçar ka treguar vazhdimësi dhe nivel të lartë në ndeshjet e zhvilluara, ndërsa këtë sezon ka dhënë kontribut edhe në sulm, me dy gola dhe një asistim.
Përvoja te Llapi dhe rikthimi në Kosovë
Aliu ka kaluar nëpër përfaqësueset e Gjermanisë nga grupmosha U15 deri në U18, ndërsa më pas zgjodhi të luante për Kosovën në nivelin U21. Në të kaluarën ka qenë pjesë e Schalke 04, Holstein Kiel dhe Hansa Rostock, kurse te Llapi u transferua në verën e vitit 2025.
Gjatë një interviste për Telegrafin, ai ka rrëfyer përvojën e tij te klubi nga Podujeva, arsyet që e shtynë të rikthehej në futbollin kosovar, përfaqësimin e Kosovës, paraqitjet personale dhe gjendjen e skuadrës, si dhe synimet për vazhdimin e sezonit.
Aliu tregon se përshtatja e tij te Llapi ka qenë e shpejtë dhe se që prej ditës së parë është ndier i mirëpritur nga klubi dhe bashkëlojtarët. Ai veçon edhe rolin e trajnerit Tahir Batatina, i cili i ka besuar dhe i ka dhënë hapësirë.
Sipas mbrojtësit, ai ndihet shumë i lumtur që është pjesë e Llapit, pasi pritja e mirë nga klubi dhe lojtarët e ka ndihmuar që të ndihet menjëherë komod. Aliu ka theksuar se Batatina ka pasur rëndësi të veçantë, duke i besuar dhe duke i ofruar mundësinë për të luajtur.
Vendimi për t’u kthyer në Kosovë, siç shpjegon ai, lidhej me dëshirën për të nisur një kapitull të ri në karrierë. Aliu thotë se e kishte kuptuar se Superliga e Kosovës ka nivel të lartë dhe se, pas gati një viti e gjysmë, nuk është penduar për zgjedhjen e bërë, duke u shprehur i kënaqur me arritjet.
Përfaqësimi i Kosovës në nivelin U21 është një përvojë që Aliu e konsideron të veçantë. Ai ka treguar se vendimin e ka marrë me zemër dhe se shpreson që në të ardhmen të ketë mundësi ta përfaqësojë vendin e tij, një ëndërr që, sipas tij, e ka çdo futbollist.
Kontributi në sulm dhe objektivat e sezonit
Ndonëse pozita e tij është në repartin e mbrojtjes, këtë edicion Aliu ka ndihmuar Llapin edhe në fazën ofensive. Megjithatë, ai nënvizon se objektivi kryesor mbetet suksesi i ekipit dhe se detyra e tij parësore si qendërmbrojtës është mbrojtja.
Futbollisti pranon se e pëlqen përfshirjen në aksionet sulmuese, edhe për faktin se ka luajtur në mesfushë, por shprehet i kënaqur sa herë që kontribuon me gol ose asistim. Për të, gjithsesi, rezultatet e skuadrës kanë përparësi ndaj statistikave individuale.
Llapi deri tani nuk i ka përmbushur pritjet në këtë edicion dhe ka grumbulluar vetëm pesë pikë. Aliu megjithatë beson se ekipi ka cilësi dhe potencial të mjaftueshëm për ta përmirësuar situatën.
Ai ka deklaruar se skuadra ka pritur më shumë nga rezultatet e deritanishme, pasi sipas tij klubi dhe lojtarët meritojnë më tepër. Për formën personale, Aliu është shprehur i kënaqur me progresin e bërë, por ka shtuar se si ekipi, ashtu edhe në aspektin individual, mund të japin edhe më shumë.
Objektivi i Llapit për pjesën e mbetur të sezonit mbetet sigurimi i një vendi në garat evropiane. Pavarësisht pozitës së krijuar nga rezultatet aktuale, Aliu vlerëson se skuadra ka kapacitet për të arritur shumë më tepër dhe shpreson se ky synim do të realizohet.
Në planin personal, mbrojtësi synon të zhvillojë një sezon të mirë dhe të vazhdojë ngritjen në karrierë. Ai nuk e fsheh dëshirën për të bërë një hap të rëndësishëm dhe për të siguruar një transferim jashtë Kosovës.
Aliu ka bërë të ditur se synimi i tij kryesor është një sezon i suksesshëm, ndërsa, sikurse çdo futbollist, dëshiron të arrijë sa më lart. Në këtë kuadër, ai shpreson që në të ardhmen të realizojë një kalim te një klub jashtë vendit.
Në përmbyllje, 23-vjeçari ka shprehur mirënjohjen e tij për trajnerin Tahir Batatina dhe stafin e Llapit, të cilët e kanë mbështetur dhe i kanë dhënë besim maksimal, veçanërisht gjatë një periudhe të vështirë para ardhjes së tij në Kosovë.
Burimi: www.albeu.com
