Kryetarja e Kuvendit, Albulena Haxhiu, ka theksuar se përfundimi i mandatit nuk do t’i lirojë zyrtarët publikë nga verifikimi i pasurisë. Në një intervistë për RTK-në, ajo deklaroi se ligji për Byronë për Verifikimin dhe Konfiskimin e Pasurisë së Pajustifikuar do të mbulojë edhe persona të tretë, në rastet kur ekziston dyshimi se pasuria u është kaluar atyre për ta fshehur.
Haxhiu e konsideroi këtë ligj një nga mjetet më të rëndësishme në luftën kundër korrupsionit dhe krimit të organizuar. Sipas saj, fokusi nuk janë të gjithë qytetarët, por zyrtarët ndaj të cilëve ka dyshime se e kanë shfrytëzuar pozicionin për të grumbulluar pasuri që nuk mund të shpjegohet me burime ligjore.
Kompetencat e Byrosë
Byroja do të kontrollojë pasurinë e zyrtarëve publikë, duke përfshirë edhe atë që mund të jetë transferuar te persona të tretë. Nëse të ardhurat nuk e justifikojnë pasurinë e fituar, institucioni do t’i kërkojë gjykatës konfiskimin e saj.
Sipas shpjegimit të Haxhiut, kur paga dhe të ardhurat e një zyrtari nuk përputhen me pasurinë që ai posedon, do t’i kërkohet të dëshmojë burimin e saj. Kjo përfshin sqarimin e origjinës së mjeteve me të cilat janë blerë një banesë, një automjet ose një shtëpi në bregdet.
Ajo theksoi se Byroja nuk mund të kryejë vetë konfiskime. Kur pasuria nuk gjen justifikim, institucioni ia paraqet kërkesën gjykatës, e cila ka kompetencën të marrë vendimin përfundimtar.
Nisja e procesit dhe afatet
Procesi i verifikimit, sipas Haxhiut, mund të bazohet te deklarimet e zyrtarëve ose të nisë me iniciativën e vetë Byrosë. Si shkak për fillimin e tij mund të shërbejnë edhe raportimet e institucioneve dhe të palëve të treta, përfshirë qytetarët.
Para se ligji t’i dërgohet presidentes për dekretim, duhet të mbarojë afati tetëditor. Gjatë kësaj periudhe, deputetët dhe palët e tjera të autorizuara kanë të drejtë ta çojnë ligjin në Gjykatën Kushtetuese.
Me hyrjen e ligjit në fuqi, Kuvendi do të zgjedhë drejtorin e Byrosë, theksoi Haxhiu. Ajo e cilësoi të rëndësishme përzgjedhjen e një stafi me integritet të lartë, si në aspektin moral ashtu edhe në atë profesional.
Haxhiu nënvizoi edhe rolin parandalues të këtij mekanizmi, me qëllim që politika të mos perceptohet nga askush si rrugë për pasurim të paligjshëm.
Burimi: www.albeu.com
