Atolet Bikar dhe Bokak, në Ishujt Marshall, përbëjnë një pasuri të jashtëzakonshme të biodiversitetit detar.
Dy atole koralore në Oqeanin Paqësor, Bikar dhe Bokak, janë identifikuar si ndër ekosistemet më të paprekura në botë. Të vendosura në rajonin e Ishujve Marshall, mes Havait dhe Filipineve, ato përbëjnë një pikë të rëndësishme referimi për studimet ekologjike dhe mbrojtjen e biodiversitetit detar.
Një studim shkencor mbi biodiversitetin
Biodiversiteti i jashtëzakonshëm i këtyre zonave është dokumentuar në një studim të publikuar në revistën shkencore Frontiers in Marine Science. Autorët janë një grup studiuesish të programit Pristine Seas, pjesë e National Geographic Society, që merret me eksplorimin, kërkimin shkencor dhe ruajtjen e oqeaneve.
Në vitin 2023, në këto dy atole u realizua një monitorim i detajuar i ekosistemeve tokësore, detare dhe ajrore. Pas disa vitesh analizimi të të dhënave dhe vëzhgimeve, studiuesit vlerësuan se rreth 48 mijë kilometra katrorë përreth tyre përbëjnë një zonë detare me rëndësi të veçantë për ruajtjen e natyrës, ku përfshihen edhe barriera koralore të paprekura.
Speciet e identifikuara
Gjatë hulumtimit u identifikuan 15 koloni shpendësh detarë, 266 grupe peshqish të shkëmbinjve koralorë që jetojnë në thellësi të mëdha, si dhe 79 grupe peshqish që banojnë në zonat e thella të oqeanit.
Po ashtu, u dokumentuan 15 grupe grabitqarësh të ujërave të hapura, dy prej të cilave përfaqësojnë specie të reja për shkencën. Këto zbulime dëshmojnë rëndësinë e jashtëzakonshme të atoleve Bikar dhe Bokak për kërkimin shkencor dhe mbrojtjen e ekosistemeve detare. KultPlus.com
Burimi: kultplus.com










