Më 4 nëntor 1847, në Leipzig të Gjermanisë, ndërroi jetë kompozitori, pianisti dhe organisti Felix Mendelssohn Bartholdy, një nga figurat më të rëndësishme të muzikës romantike. Ai vdiq në moshën 38-vjeçare, duke lënë pas një krijimtari të pasur dhe një ndikim të qëndrueshëm në jetën koncertale evropiane.
I lindur më 3 shkurt 1809 në Hamburg, Mendelssohn shfaqi talent të jashtëzakonshëm muzikor që në fëmijëri. Ai filloi të kompozonte në moshë të re dhe shpejt u njoh si pianist dhe dirigjent. Gjatë karrierës udhëtoi në disa vende të Evropës, ku interpretoi dhe drejtoi veprat e tij si dhe ato të kompozitorëve të tjerë.
Veprat më të njohura
Ndër krijimet e tij më të njohura përfshihen uvertura “Ëndrra e një nate vere”, e frymëzuar nga William Shakespeare, Simfonia Italiane, Simfonia Skoceze, koncerti për violinë në mi minor dhe oratoriumet “Paulus” dhe “Elias”.
Kontributi për Bach dhe Händel
Mendelssohn luajti gjithashtu një rol të rëndësishëm në rikthimin e interesimit për muzikën e Johann Sebastian Bach dhe Georg Friedrich Händel. Në vitin 1829, ai drejtoi në Berlin një interpretim të Pasionit sipas Mateut të Bach-ut, duke ndihmuar rizbulimin e kësaj vepre madhore.
Themelimi i Konservatoriumit të Leipzigut
Një tjetër kontribut i rëndësishëm ishte themelimi, në vitin 1843, i Konservatoriumit të Leipzigut, institucioni i parë i këtij lloji në Gjermani, që hapi mundësi të reja për edukimin dhe zhvillimin e muzikantëve.
Felix Mendelssohn Bartholdy mbetet një nga emrat e shquar të romantizmit muzikor, ndërsa veprat dhe kontributi i tij vazhdojnë të jenë pjesë e repertorit klasik botëror./KultPlus.com
Burimi: kultplus.com
