Një konflikt mes dy fëmijëve për pasurinë e prindërve ka përfunduar në dyert e drejtësisë britanike. Aktori Robert Rajhpaul ka nisur një betejë ligjore kundër motrës së tij, Precious, duke pretenduar se ajo ka ndikuar në mënyrë të padrejtë te nëna e tyre për ta përjashtuar atë nga trashëgimia.
Çështja lidhet me pasurinë e Milda Rajhpaul, e cila u nda nga jeta në vitin 2024, në moshën 88-vjeçare. Trashëgimia e saj vlerësohet në rreth 1.2 milionë paund, ku përfshihet edhe një pronë në perëndim të Londrës, me vlerë afërsisht 900 mijë paund.
Pika e konfliktit është testamenti i hartuar në gusht të vitit 2023, përmes të cilit e gjithë pasuria i kalonte Precious, e cila ishte kujdesur për të ëmën gjatë viteve të fundit të jetës. Robert pretendon se ky vendim nuk ishte marrë me vullnet të lirë nga nëna e tyre dhe se motra kishte ushtruar presion për të siguruar të gjithë trashëgiminë.
Gjatë paraqitjes në Gjykatën e Qarkut të Londrës Qendrore, aktori tregoi edhe për gjendjen e vështirë në të cilën ndodhet aktualisht. Ai deklaroi se nuk ka një banesë të përhershme dhe po jeton në një strehë të përkohshme për të pastrehët, së bashku me qenin e tij, Twinkle.
Sipas pretendimeve të tij, motra kishte kufizuar kontaktet e nënës me pjesën tjetër të familjes, duke ndryshuar edhe bravat e banesës dhe duke hequr linjën telefonike.
“Precious ndërroi bravat e derës dhe nuk lejoi asnjë anëtar të familjes të takonte nënën time. Ajo hoqi edhe linjën telefonike, sepse e dinte që nëna ime po përpiqej të transferonte një pjesë të pronës në emrin tim”, deklaroi Robert përpara gjykatës.
Aktori kërkon që testamenti të shpallet i pavlefshëm, duke ngritur dyshime edhe mbi gjendjen mendore të së ëmës në momentin e nënshkrimit. Ai pretendon se ajo nuk kishte kapacitetin e nevojshëm për të kuptuar vendimet që po merrte dhe se dokumenti ishte hartuar nën ndikimin e së bijës.
Përplasja mes tyre nuk kufizohet vetëm te prona. Dyshimet e Robert lidhen edhe me paratë që Milda kishte lënë në bankë. Ndërsa Precious pretendon se shuma ishte vetëm 16,530 paund, vëllai këmbëngul se nëna kishte rreth 315 mijë paund në llogaritë e saj.
Një tjetër çështje që ai ka ngritur lidhet me ceremoninë mortore. Robert pretendon se motra nuk respektoi dëshirën e nënës për t’u varrosur sipas traditës së krishterë, pranë bashkëshortit të saj, por vendosi që trupi të kremtohej.
Përmes një kërkese të bazuar në ligjin britanik të trashëgimisë të vitit 1975, aktori kërkon gjithashtu mbështetje financiare nga pasuria e së ëmës, duke argumentuar se kishte qenë ekonomikisht i varur prej saj.
Nga ana tjetër, Precious i ka mohuar akuzat dhe kërkon që testamenti të njihet si plotësisht i vlefshëm. Përfaqësuesja e saj ligjore, Nicola Phillipson, ka kundërshtuar pretendimet e të vëllait, duke argumentuar se ato nuk mbështeten nga prova të mjaftueshme, përfshirë dokumentacion mjekësor që do të vërtetonte pretendimet mbi gjendjen e nënës.
Një karrierë artistike që u la në hije nga beteja familjare
Robert Rajhpaul kishte nisur të shfaqte interes për aktrimin që në fëmijëri. Ai kujton se një prej emrave të njohur të filmave britanikë “Carry On”, Hattie Jacques, kishte ndjekur një shfaqje të tij shkollore, ku interpretonte një nga tre dijetarët.
Më vonë, ai studioi në akademinë prestigjioze të artit dramatik RADA dhe në Actors Studio në Pinewood. Formimi i tij përfshinte edhe aftësi të veçanta për luftimin skenik, përdorimin e armëve dhe kalërimin.
Sot, megjithatë, ai ndodhet përballë një realiteti krejt tjetër, duke kërkuar në gjykatë të drejtën për të përfituar nga trashëgimia familjare.
Gjykatësi Nigel Gerald vendosi ta shtyjë seancën, në mënyrë që Robert të ketë kohë të sigurojë një përfaqësues ligjor dhe të përgatitë më mirë argumentet e tij.
Gjatë seancës, gjykatësi e paralajmëroi se akuzat e ngritura janë serioze dhe se një proces i tillë mund të sjellë kosto të konsiderueshme. Ai theksoi gjithashtu se, në mungesë të provave bindëse, padia mund të mos vazhdojë.
Kështu, fati i trashëgimisë prej 1.2 milionë paundësh mbetet ende i paqartë, ndërsa përplasja mes vëllait dhe motrës do të vijojë të shqyrtohet nga drejtësia britanike.
Burimi: bordo.al
