Këngëtarja e njohur ndërkombëtarisht Dua Lipa tërhoqi vëmendjen në Festivalin e Letërsisë në Londër 2026, ku foli për dashurinë e saj për librat dhe u shfaq me dy veshje të veçanta, duke prezantuar njëkohësisht një nga trendet më të dukshme të bukurisë për sezonin vjeshtë-dimër 2026.
Lipa mori pjesë në një bisedë në Royal Festival Hall në Londër, së bashku me shkrimtaren Zadie Smith dhe poetin Mustafa. Diskutimi u fokusua te letërsia, lista e saj e gjatë e leximeve dhe romani debutues i Smithit, “White Teeth”, i botuar në vitin 2000. Këngëtarja, e cila e ka treguar vazhdimisht dashurinë për librat edhe përmes nismës së saj Service95 Book Club, u shfaq me dy stile të ndryshme, por njësoj tërheqëse.
Paraqitja e parë me Chanel
Për paraqitjen e parë, ajo zgjodhi një kombinim nga koleksioni vjeshtë 2026 i Chanel, në ngjyrë të kuqe të ndezur, me detaje prej gëzofi artificial në mëngë dhe në pjesën e ijeve. Veshjen e plotësoi me çizme të zeza deri te gjuri nga Le Silla, ndërsa flokët i kishte mbledhur në një topuz elegant, duke vënë në pah vathët gjeometrikë, shkruan KultPlus.
Paraqitja e dytë me Prada
Në paraqitjen e dytë, këngëtarja u shfaq me një kombinim të plotë nga Prada, i përbërë nga një bluzë pa mëngë dhe një fund midi prej najloni të zi. Vëmendjen e tërhoqën këpucët me taka të shkurtra, të mbuluara plotësisht me pupla të bardha artificiale, të cilat kushtojnë rreth 2.450 dollarë. Ato i kombinoi me çorape të markës Prada, të zbukuruara me motive floreale.
Megjithatë, përveç veshjeve, një detaj tjetër i paraqitjes së saj u kthye në frymëzim për sezonin e ri të bukurisë: manikyri në ngjyrë të gjelbër të errët, i njohur si bottle green. Përmes një sërë fotografish të publikuara në Instagram, Dua Lipa prezantoi këtë nuancë elegante, e cila pritet të jetë ndër trendet e dukshme të vjeshtës dhe dimrit 2026.
Këngëtarja kishte zgjedhur ngjyrën e gjelbër të thellë për thonjtë e gjatë, në formë bajameje, duke i dhënë manikyrit një efekt kromi me shkëlqim metalik. Përfundimi pasqyron dritën dhe krijon një pamje të ngjashme me efektin cat-eye, duke i dhënë ngjyrës një dimension më të sofistikuar.
Kjo nuancë, që shpesh lidhet me festat e fundvitit, këtë sezon shfaqet në një version më të errët dhe elegant, të përshtatshëm për kombinime të ndryshme. Efekti i shkëlqyeshëm të kujton edhe thonjtë e famshëm glazed donut, të popullarizuar nga Hailey Bieber, por me një tonalitet më të thellë dhe më karakteristik për stinën e ftohtë.
Përmes stilit të saj, Dua Lipa dëshmon edhe një herë se paraqitjet publike mund të shërbejnë si burim frymëzimi jo vetëm për modën, por edhe për tendencat e bukurisë./KultPlus.com
Burimi: kultplus.com
