Kryetarja e Kuvendit të Kosovës, Albulena Haxhiu, ka evokuar një nga periudhat më të rënda të jetës së saj, duke ndarë një mesazh falënderimi për familjen Sinani dhe shqiptarët e tjerë të Maqedonisë së Veriut, të cilët gjatë luftës në Kosovë strehuan shumë familje refugjatësh, raporton KultPlus.
Njëzet e shtatë vjet më pas, Haxhiu është rikthyer pranë njerëzve që e pritën kur ajo ishte ende fëmijë refugjate lufte. Kjo vizitë, përveçse ringjall kujtimet, përbën edhe një moment mirënjohjeje për mikpritjen, bujarinë dhe solidaritetin e shfaqur në ditët kur shumë familje kosovare u detyruan të braktisin shtëpitë e tyre.
Mesazhi i Haxhiut për familjen Sinani
Përmes një postimi në rrjetet sociale, Haxhiu ka shprehur mirënjohjen e saj për familjen Sinani dhe shqiptarët e Maqedonisë së Veriut, të cilët në ditët më të vështira të luftës hapën dyert e shtëpive dhe zemrat e tyre për refugjatët nga Kosova.
Në vijim, KultPlus ua sjell postimin e plotë të Albulena Haxhiut:
Pas 27 vitesh, u ktheva aty ku kisha ardhur si fëmijë refugjat lufte.
U ktheva për t’u çmallur, për të kujtuar dhe për të falënderuar familjen Sinani dhe shqiptarët e tjerë të Maqedonisë së Veriut, të cilët, në ditët më të vështira të luftës, na i hapën dyert e shtëpive dhe zemrat e tyre.
Mirënjohje e përjetshme për solidaritetin, bujarinë dhe humanizmin e tyre./KultPlus.com
Burimi: kultplus.com
