Kylian Mbappé është përfshirë në një polemikë që ka nxitur reagime të forta në Kinë, pas disa komenteve të bëra gjatë një interviste të fundit lidhur me Mao Zedong. Sulmuesi i Real Madridit ka kërkuar falje publike, pasi deklaratat e tij u pritën negativisht dhe dy kompani kineze ndërprenë marrëveshjet e sponsorizimit me futbollistin.
Falja publike e Mbappé
Kapiteni i kombëtares franceze e kishte cilësuar Mao Zedong si diktator, një koment për të cilin tashmë shprehet i penduar. Në një deklaratë të publikuar në frëngjisht, anglisht dhe kinezisht, 27-vjeçari pranoi se fjalët e tij nuk ishin të përshtatshme dhe se kishin lënduar një pjesë të publikut.
“U kërkoj ndjesë të gjithë atyre që janë ndier të fyer nga komentet e mia gjatë një interviste të fundit. Fjalët e mia ishin të pavend dhe e kuptoj se kanë shkaktuar shqetësim te shumë njerëz në Kinë dhe në komunitetet kineze në mbarë botën. Ky nuk ishte qëllimi im. Kam respekt të madh për popullin kinez dhe historinë e tij dhe më vjen sinqerisht keq”, deklaroi futbollisti.
Reagimi i La Liga
Në këtë debat është përfshirë edhe La Liga, ku reagimi erdhi nga presidenti Javier Tebas. Përmes një postimi në rrjetin social X, ai shprehu keqardhjen për deklaratat e lojtarit dhe kërkoi ndjesë në emër të institucionit ndaj publikut kinez.
Tebas theksoi se La Liga ka ndërtuar prej vitesh marrëdhënie të rëndësishme me Kinën, institucionet e saj dhe organizatat sportive, të mbështetura te respekti dhe bashkëpunimi. Sipas tij, një incident i tillë nuk duhet të dëmtojë lidhjet e krijuara ndër vite.
Kreu i futbollit spanjoll nënvizoi gjithashtu se pasojat e kësaj situate mund të prekin jo vetëm marrëdhëniet institucionale, por edhe më shumë se 20 klubet e garave profesioniste spanjolle dhe miliona tifozë kinezë.
Kërkimfalja e Mbappé vjen në një moment kur komentet e tij kanë sjellë pasoja edhe në aspektin komercial, ndërsa reagimi i La Liga-s tregon se çështja ka marrë përmasa përtej një deklarate personale të yllit francez.
Burimi: bordo.al
