Autoritetet, me mbështetjen e Eurojust dhe Europol, kanë ndërmarrë një operacion kundër një rrjeti kriminal që administronte një skemë mashtrimi me investimet. Operacioni ka çuar në mbylljen e më shumë se 100 serverëve dhe arrestimin e shtatë personave.
Operacioni vjen pas arrestimeve dhe kontrolleve të mëparshme të zhvilluara në vitet 2022 dhe 2025. Skema e mashtrimit përdorte platforma online tregtimi, të cilat paraqiteshin si të ligjshme, për të joshur viktimat që të transferonin shuma të mëdha parash. Humbjet e përllogaritura nga kjo skemë i kalojnë 4 milionë eurot.
Si funksiononte skema e mashtrimit
Në vitin 2022, një çift gjerman bëri kallëzim pasi kishte investuar kursimet e tij përmes një platforme online, por më pas kishte konstatuar se nuk mund të tërhiqte fitimet e pretenduara. Ky kallëzim vuri në lëvizje hetimet, të cilat zbuluan një skemë ndërkombëtare mashtrimi që kishte në shënjestër viktima në mbarë botën.
Mashtruesit premtonin fitime të jashtëzakonshme brenda një kohe të shkurtër përmes tregtimit të kriptomonedhave, valutave të huaja dhe aksioneve.
Pasi viktimat transferonin një shumë të vogël parash, në platformë u shfaqeshin fitime të fryra, me qëllim që investimi të dukej i ligjshëm dhe fitimprurës.
Më pas, personat që paraqiteshin si ndërmjetës financiarë ushtronin presion psikologjik ndaj viktimave, duke i bindur të investonin shuma gjithnjë e më të mëdha.
Kur viktimat kërkonin të tërhiqnin fitimet, mashtruesit përdornin taktika të ndryshme për të zvarritur procesin dhe për të penguar tërheqjen e parave. Në fund, autorët zhdukeshin dhe viktimat kuptonin se kishin humbur paratë e tyre.
Arrestimi i të dyshuarve
Pas më shumë se katër vitesh hetime, një operacion i parë ndërkombëtar goditi skemën e mashtrimit, duke çuar në dy arrestime dhe sekuestrimin e një sasie të konsiderueshme provash.
Pas analizimit të materialeve të sekuestruara, hetuesit identifikuan edhe shtatë të dyshuar të tjerë, mes tyre drejtuesit e qendrave të telefonatave (call center), të cilat përdoreshin për të bindur viktimat të investonin shuma të tjera parash.
Autoritetet organizuan një tjetër ditë operacionale ndërkombëtare, gjatë së cilës u arrestuan persona të tjerë dhe u sekuestruan prova dhe para.
Provat e mbledhura gjatë operacionit të dytë çuan në ndërhyrjen e sotme.
Analiza e tyre zbuloi një kompani me bazë në Qipro dhe Izrael, e cila dyshohet se ofronte shërbime kriminale kundrejt pagesës, të njohura si “crime-as-a-service”. Kompania dyshohet se u furnizonte grupe të ndryshme kriminale me faqe interneti mashtruese, të cilat përdoreshin për të kryer skema mashtrimi online.
Autoritetet identifikuan gjithashtu klientë të dyshuar të kësaj kompanie në Shqipëri, Kosovë dhe Maqedoninë e Veriut, të cilët dyshohet se administronin qendra telefonatash të përdorura për mashtrime.
Operacioni kishte në shënjestër këta persona dhe serverët që përdoreshin për aktivitetin e tyre kriminal.
Në total, autoritetet kontrolluan 17 ambiente, përfshirë një qendër telefonatash në Kosovë. U sekuestruan më shumë se 100 serverë, si dhe prova dhe pasuri të tjera.
Shtatë të dyshuar u arrestuan me qëllim dorëzimin ose ekstradimin e tyre drejt Gjermanisë.
Bashkëpunimi ndërkombëtar
Bashkëpunimi ndërkombëtar ka qenë thelbësor për shkatërrimin e kësaj skeme mashtrimi, ndërsa Eurojust dhe Europol kanë luajtur rol qendror që prej fillimit të operacionit.
Eurojust mbështeti ekzekutimin e disa urdhrave evropianë të hetimit, urdhrave evropianë të arrestit dhe urdhrave të ngrirjes së pasurive. Agjencia siguroi gjithashtu bashkëpunimin mes vendeve të ndryshme për shkëmbimin e informacionit, përcaktimin e strategjive dhe planifikimin e operacioneve të përbashkëta.
Pranë Eurojust u ngritën dy ekipe të përbashkëta hetimore: njëri përfshinte autoritetet gjermane, polake dhe shqiptare, ndërsa tjetri autoritetet shqiptare dhe ato të Kosovës.
Gjatë operacionit të sotëm, Eurojust koordinoi të gjitha veprimet gjyqësore nga selia e saj në Hagë.
Nga ana tjetër, Europol ofroi analiza të zgjeruara, krahasoi të dhënat me bazat e tij të informacionit dhe bashkoi hetuesit kombëtarë për të përgatitur operacionin e përbashkët.
Ditën e operacionit, Europol dërgoi ekspertë në Shqipëri dhe Kosovë për të mbështetur punën e ekspertizës digjitale dhe për të kryer verifikime të menjëhershme në bazat e të dhënave të agjencisë.
Gjithashtu, Qendra e Komandimit Virtual e Europol mbështeti ndërhyrjen e koordinuar.
Autoritetet pjesëmarrëse në operacion
Operacioni u zhvillua nga autoritetet e këtyre vendeve:
Gjermani: Prokuroria pranë Gjykatës Rajonale të Itzehoes, Departamenti për Luftën kundër Krimit Kibernetik; Zyra Shtetërore e Hetimit Kriminal e Schleswig-Holstein.
Qipro: Policia e Qipros.
Finlandë: Byroja Kombëtare e Hetimit.
Shqipëri: Prokuroria e Posaçme kundër Korrupsionit dhe Krimit të Organizuar (SPAK); Byroja Kombëtare e Hetimit; Policia e Shtetit.
Izrael: Policia e Izraelit, Njësia Kombëtare për Krimin Kibernetik Lahav 433 dhe Njësia e Ndihmës Ligjore, Drejtoria e Inteligjencës.
Kosovë: Prokuroria Speciale e Republikës së Kosovës; Policia e Kosovës, Drejtoria për Hetimin e Krimeve Ekonomike dhe Korrupsionit, Sektori i Hetimeve Financiare.
Maqedonia e Veriut: Prokuroria Themelore Publike për Ndjekjen e Krimit të Organizuar dhe Korrupsionit; Ministria e Brendshme, Byroja për Siguri Publike, Departamenti për Luftën kundër Krimit të Organizuar dhe Krimeve të Rënda.
Burimi: lajmifundit.al
