Klubi i Manchester United kishte përfshirë edhe trajnerin e Komos në listën e kandidatëve të mundshëm për stolin. Drejtuesit anglezë diskutuan emrin e Çesk Fabregasit përpara se të zyrtarizonin marrëveshjen me Mauricio Pochettino.
Gjithçka nisi pas humbjes ndaj Comos
Sipas prestigjiozes “The Athletic”, gjithçka nisi pas humbjes 4-1 që skuadra pësoi në Ligën e Kampioneve ndaj Comos. Kjo disfatë pikërisht përballë ekipit italian muajin e kaluar vuri në lëvizje bordin drejtues për shkarkimin e Michael Carrick.
Klubi anglez priti pushimin e kombëtareve për të zyrtarizuar largimin e tij dhe për të emëruar trajnerin e ri. Për të afruar Pochettinon, ata paguan rreth 9 milionë paund për të prishur kontratën me kombëtaren e Shteteve të Bashkuara.
Emeri refuzoi, Fabregasi u shqyrtua
Megjithatë, trajneri argjentinas nuk ishte zgjedhja e parë në listën e dëshirave të drejtuesve të “Djajve të Kuq”. Objektivi kryesor ishte Unai Emeri, por trajneri i Aston Villës nuk pranoi të largohej nga projekti i tij.
Tekniku spanjoll e refuzoi ofertën pasi ka një kontratë të vlefshme me klubin e tij aktual deri në vitin 2029. Në këto kushte, drejtuesit shqyrtuan edhe profilin e Fabregasit si një mundësi konkrete për stolin.
Raportohet se pavarësisht diskutimeve të brendshme, nuk pati asnjë kontakt zyrtar mes palëve. Klubi anglez nuk i paraqiti asnjë ofertë as vetë trajnerit spanjoll dhe as drejtuesve të Comos.
Pse largimi i Fabregasit ishte i vështirë
Një largim i tij në këtë fazë të sezonit konsiderohej një mision thuajse i pamundur për t’u realizuar. Gjatë merkatos së verës, pronari i klubit italian, kishte refuzuar në mënyrë kategorike një ofertë nga Interi.
Për më tepër, pozitat e trajnerit u forcuan edhe më shumë pas rezultateve të arritura kohët e fundit në arenën europiane. Ekipi i tij kaloi vetë Manchester United në muajin e kaluar dhe regjistroi një fitore 9-1 kundër francezëve të Lensit.
Burimi: www.cna.al










