Kreu i PD-së, Sali Berisha, ka reaguar ashpër ndaj gjobave që Autoriteti i Mediave Audiovizive (AMA) ka vendosur ndaj televizioneve për përdorimin e gjuhës që konsiderohet e papërshtatshme në transmetime. Gjatë një interviste në emisionin “Drejt” në Ora News, Berisha e quajti këtë praktikë një formë kontrolli mbi lirinë e shprehjes dhe e krahasoi me mekanizmat e censurës të periudhës komuniste.
Krahasimi me Afganistanin
Berisha përdori edhe një krahasim me Afganistanin për të kundërshtuar atë që e sheh si ndërhyrje të shtetit në caktimin e gjuhës që duhet përdorur në hapësirën publike. “Është totalisht talebaneske. Është një lloj si në Kabul, ku Ministria e Virtutit përcakton të gjithë fjalorin dhe të gjithë kontekstin”, deklaroi ai. Sipas tij, vendosja e gjobave për këtë arsye përbën një hap prapa për demokracinë shqiptare, sidomos pas 35 vitesh pluralizëm politik.
Referimi te periudha komuniste
“Ne që kemi përjetuar diktaturën komuniste e kemi të qartë se ç’do të thotë. Rikthimi i kësaj praktike pas 35 vitesh pluralizëm është absolutisht involucioni i Edi Ramës tek Kristaq xhelat Rama apo Spiro Koleka. Është gjë e paimagjinueshme”, u shpreh kreu i PD-së.
Krahasimi me dekretin e Ramiz Alisë
Në vijim të qëndrimit të tij, Berisha solli në vëmendje edhe një dekret të ish-presidentit Ramiz Alia, që lidhej me mbrojtjen e personaliteteve historike dhe kulturore. Ai argumentoi se edhe në atë periudhë, pavarësisht masave represive, nuk përdorej mekanizmi i gjobave për çështje të tilla. “Ramizi në qoftë se u kujtohet, e bëri dekretin për mbrojtjen e personaliteteve historike dhe kulturore, dhe futi aty Nolin, Sami Frashërin, Enver Hoxhën e kështu me radhë. Por e vërteta është që arrestoi tek-tuk, po gjoba nuk vuri”, tha Berisha.
Deklaratat e tij rikthejnë në vëmendje debatin mbi kufijtë e kompetencave të AMA-s, rregullimin e përmbajtjeve mediatike dhe raportin mes mbikëqyrjes së transmetimeve dhe garantimit të lirisë së shprehjes.
Burimi: kohajone.com
