TIRANË, 9 nëntor /ATSH/ Autoriteti Kombëtar për Sigurinë Kibernetike ka paralajmëruar qytetarët për mesazhe mashtruese që qarkullojnë përmes SMS-ve. Mesazhet përdorin emrin e Drejtorisë së Përgjithshme të Shërbimeve të Transportit Rrugor dhe pretendojnë se marrësit kanë shkelje trafiku apo detyrime të papaguara.
Si funksionon mashtrimi
Sipas AKSK-së, qëllimi i këtyre mesazheve është t’i nxisin qytetarët të klikojnë lidhje të rreme dhe të japin të dhënat e tyre personale. Për ta arritur këtë, mesazhet përdorin presion dhe kërcënime me penalizime, nëse marrësi nuk vepron menjëherë.
Masat e marra
AKSK njofton se, në bashkëpunim me institucionet përgjegjëse, ka marrë masat e nevojshme për trajtimin e rastit. Agjencia vijon monitorimin për identifikimin e tentativave të ngjashme mashtruese, me qëllim kufizimin e rrezikut për qytetarët.
Këshillat për qytetarët
AKSK u kërkon qytetarëve të mos klikojnë lidhjet e përfshira në këto mesazhe dhe të mos u përgjigjen dërguesve. Gjithashtu, nuk duhet të ndahen të dhëna personale, bankare apo kode verifikimi.
Qytetarët këshillohen të verifikojnë çdo njoftim përmes kanaleve zyrtare të institucioneve, duke aksesuar vetë faqet e tyre zyrtare. Mesazhet e dyshimta duhet të bllokohen dhe të raportohen si të padëshiruara.
/e.i/r.e/
Burimi: ata.gov.al
