Kalo te përmbajtja

Lajme të shpejta, të verifikuara dhe të paanshme

Lajm i fundit
Politikë

Zelensky kërkon që Evropa të përfshihet në bisedimet me Rusinë

Zelensky kërkon që Evropa të përfshihet në bisedimet me Rusinë
Foto: ata.gov.al

BERLIN, 19 nntor /ATSH-DPA/ – Presidenti i Ukrainës, Volodymyr Zelensky, ka kërkuar përfshirjen e shpejtë të Evropës në bisedimet e ndërmjetësuara nga Shtetet e Bashkuara me Rusinë, pas takimit të së ashtuquajturit “Koalicioni i të Vullnetshmëve”, të mbajtur sot në Berlin.

Kërkesa për një format katërpalësh

“Ukraina, Evropa, SHBA-ja dhe Rusia. Ne mbështetemi shumë në këtë format”, deklaroi Zelensky, duke theksuar se takimi i ardhshëm duhet të jetë katërpalësh.

Ndërkohë, po zhvillohen bisedime të veçanta me ndërmjetësit amerikanë Steve Witkoff dhe Jared Kushner lidhur me kohën dhe agjendën e takimit të ardhshëm.

Presioni ndaj Rusisë

Kreu i shtetit ukrainas tha se synimi është të mos humbet kohë përpara dimrit dhe se Rusia duhet të vihet nën presion për të angazhuar konkretisht në procesin e arritjes së një marrëveshjeje paqeje.

“Nevojitet presion. Evropa është e gatshme të ndihmojë me sanksione të reja dhe me hapa të tjerë në mbështetje të Ukrainës dhe popullit ukrainas”, u shpreh ai.

Zelensky shtoi se pret gjithashtu që Shtetet e Bashkuara të përdorin ndikimin e tyre ndaj Rusisë për të çuar përpara procesin e paqes.

Bisedimet e fundit në Abu Dhabi

Javën e kaluar, pas një ndërprerjeje prej më shumë se tetë muajsh, në Abu Dhabi u zhvillua një raund i ri bisedimesh mes Ukrainës dhe Rusisë, me ndërmjetësimin e SHBA-së.

Në vendngjarje udhëtuan gjithashtu përfaqësues të Bashkimit Evropian, Gjermanisë, Francës, Italisë dhe Britanisë së Madhe, por ata nuk morën pjesë drejtpërdrejt në negociata.

Sa i përket përfshirjes së ardhshme të negociatorëve evropianë, nga pala ruse janë dhënë deklarata kontradiktore.

Konteksti i luftës

Ukraina po përballet me pushtimin e plotë rus që prej shkurtit të vitit 2022, duke vijuar rezistencën me mbështetjen e vendeve perëndimore.

Burimi: ata.gov.al

Të fundit Të gjitha