Rama shkarkon Veliajn nga drejtimi politik i Tiranës
Kryeministri Edi Rama ka vendosur të ndryshojë drejtimin politik të Partisë Socialiste në qarkun e Tiranës, duke larguar nga kjo detyrë Erion Veliajn, Taulant Ballën dhe Ogerta Manastirliun.
Albana Koçiu dhe Ervin Demo marrin drejtimin
Sipas burimeve për Top Channel, drejtimi politik i qarkut të Tiranës do t’u besohet tashmë Albana Koçiut dhe Ervin Demos, të cilët do të bashkëdrejtojnë strukturat socialiste në kryeqytet.
Vendimi është bërë i ditur gjatë Asamblesë Kombëtare të PS-së, që po zhvillohet në Gjirin e Lalëzit, ku kryeministri Rama ka prezantuar ndryshimet në drejtimin politik të qarqeve.
Lëvizja vjen në një moment kur marrëdhëniet mes Edi Ramës dhe Erion Veliajt janë në një pikë të tensionuar.
Letra e Veliajt nga burgu
Ky i fundit, i cili ndodhet në burgun e Fierit, u dërgoi sot anëtarëve të Asamblesë një letër të gjatë, ku kërkoi edhe aktivizimin e procedurës së mocionit të mosbesimit ndaj kryetarit të PS-së.
Ndërkohë, Rama ka paralajmëruar edhe një riorganizim më të gjerë të strukturave drejtuese të partisë, me dyfishimin e numrit të drejtuesve politikë në qarqe, nga 12 në 24.
Burimi: lajmifundit.al
