Tryeza e organizuar nga presidenti Bajram Begaj më 30 tetor për të diskutuar për datën e zgjedhjeve përbën një provë për partitë dhe për protestuesit, sipas Edmond Spaho.
Në një intervistë të drejtpërdrejtë për emisionin ‘Studio Live’ në Report Tv, ish-deputeti i Partisë Demokratike e konsideron këtë si një mundësi që protestuesit të ndërtojnë një formacion politik ose të garojnë me kandidatë të pavarur.
Qëndrimi i Spahos për zgjedhjet e parakohshme
“Nuk më duket se vendi po shkon drejt zgjedhjeve të parakohshme, pasi ata që organizuan protestat kërkojnë dorëheqjen e Edi Ramës. Nuk i kam parë të artikulojnë kërkesën për zgjedhje të parakohshme. Këtë kërkesë e ka formuluar opozita. Për të kërkuar zgjedhje të parakohshme duhet të jesh i organizuar politikisht, gjë që ata nuk e kanë bërë, madje as nuk e dimë se kush janë.
Mendoj se ky është një rast i mirë për të testuar partitë politike shqiptare dhe do të sugjeroja që protestuesit të marrin pjesë me kandidatët e tyre në këto zgjedhje. Të provojnë forcën e tyre. Të krijojnë një formacion politik ose të dalin me kandidatë të pavarur që do të gëzojnë mbështetjen e lëvizjes studentore”, u shpreh Spaho.
Sipas tij, nëse kjo lëvizje politike nuk materializohet, kjo do të ndikojë edhe në mosrealizimin e dialogut të kërkuar nga kryeministri Rama.
“Nëse nuk krijohet si lëvizje politike, edhe dialogu që kërkon kryeministri nuk më duket realist. Do të ulen disa individë, por do të dalin të tjerë që do të pretendojnë se janë edhe ata. Dialogu politik zhvillohet me përfaqësues politikë. Nëse kjo lëvizje dëshiron të ndryshojë sistemin politik në Shqipëri, duhet të hyjë në politikë. Më pas të hyjë në zgjedhje, sepse zgjedhjet janë ato që hapin derën për ndryshim”, tha ish-deputeti.
Dhuna dhe rrymat brenda protestës
Lidhur me zhvillimet e protestës gjatë 15 ditëve të fundit, Spaho veçon dhunën si një element që karakterizon popujt primitivë. Sipas tij, protestuesit jo të dhunshëm duhet të jenë ata që vendosin një kufi të qartë.
“Në Shqipëri, dhuna po kthehet në një element thelbësor. Po djegim atë që kemi ndërtuar në emër të ndërtimit të së ardhmes. Vetëm popujt primitivë e ndërtojnë të ardhmen përmes shkatërrimit dhe djegies. Pjesa më e shëndoshë e kësaj lëvizjeje duhet të distancohet që të tërheqë vëmendjen dhe simpatinë e qytetarëve”, tha Spaho.
Sipas ish-deputetit, përveç Antifa-s, brenda protestave të dhunshme veprojnë një sërë rrymash të të gjitha ‘ngjyrave’.
“Aty ka shumë rryma, duke filluar nga lëvizja që doli për zhvillimet në bregdetin e Vlorës, flamingot, më pas grupi i OJQ-ve shqiptare, gjejmë islamistë, parti politike shqiptare të vjetra e të reja që kanë të njëjtën ngjyrë. Ato veprojnë me të njëjtin stil, me forcë, në vend që të ekspozojnë natyrën e tyre”, përfundoi ish-deputeti.
Burimi: shqiptarja.com
