Partia Demokratike dhe opozita e bashkuar nuk kanë ndërmend të bojkotojnë zgjedhjet lokale të vitit të ardhshëm, deklaron Lefter Maliqi.
Kandidatura e Maliqit në Kuçovë
Ish-deputeti, i ftuar në “Studio Live” në Report Tv, thotë se ai është “kryetari de facto” i bashkisë së Kuçovës. Ai shton se ka marrë miratimin edhe nga Ilir Meta dhe Sali Berisha për të qenë kandidat në zgjedhje.
“Unë jam drejtues politik i Partisë së Lirisë. Jam takuar me Metën disa herë në paraburgim, dhe ai është në formë më të mirë se kurrë. Kemi biseduar shumë për zhvillimet politike, si dhe për qarkun e Beratit. Jam kandidati i vetëm i Partisë së Lirisë në zgjedhjet lokale. Berisha është njoftuar gjithashtu; jam takuar edhe me z. Berisha dhe e kam informuar. Së bashku me PD-në dhe me socialistët e zhgënjyer, pa ata nuk fitohet bashkia e Kuçovës. Bashkia e Kuçovës është bashki e majtë”, shprehet Maliqi.
Kushtet e zgjedhjeve dhe qëndrimi ndaj punonjësve
Ai beson se kushtet e barabarta do t’i sjellin fitore në zgjedhje dhe se, nëse humb, përgjegjësia do të jetë vetëm e tij. Maliqi thotë se nën drejtimin e tij Kuçova do të ndryshojë.
“Këtë herë kam komisionerë të barabartë, numërues, fonde dhe KZAZ-e të njëjta. Nëse humb, faji është im. Këtë herë do të marr masa të rrepta dhe do t’u siguroj qytetarëve të Kuçovës se do ta ndryshoj qytetin. Do ta ndryshoj Kuçovën dhe do ta bëj shembull në gjithë Shqipërinë. Do ta kthej në kantier ndërtimi”, thotë ish-deputeti.
Në fund, ai flet edhe për socialistët që punojnë në administratë.
“Rëndësi ka që unë do t’i shërbej popullit, pa dallim politik. I siguroj punonjësit socialistë që nuk do të largohen nga puna, përveç atyre që janë të korruptuar dhe që do të bëjnë fushatë kundër emrit tim dhe së ardhmes së Kuçovës”, përfundoi Maliqi.
Burimi: shqiptarja.com
