TIRANË, 6 nëntor/ATSH/ Partia Demokratike ka nisur mbledhjen e firmave për organizimin e një referendumi vendor mbi ndërtimin në Parkun Rinia, pasi Komisioni Qendror i Zgjedhjeve miratoi formularët për mbledhjen e nënshkrimeve.
Zyra e shtypit e PD-së njoftoi se përfaqësues të partisë janë vendosur në zonën e parkut Rinia, ku i ftojnë qytetarët të bashkohen me nismën. Ajo synon t’u japë banorëve të Tiranës mundësinë për t’u shprehur drejtpërdrejt mbi të ardhmen e kësaj hapësire publike.
Qëndrimi i PD-së
Partia Demokratike e cilëson nismën si një hap konkret për mbrojtjen e hapësirave publike dhe kundër modelit të zhvillimit urban që, sipas saj, dëmton gjelbërimin dhe cilësinë e jetesës në kryeqytet.
Thirrja për qytetarët dhe forcat opozitare
PD u bën thirrje qytetarëve të Tiranës, shoqërisë civile, aktivistëve dhe organizatave qytetare të angazhohen në mbledhjen e firmave, duke theksuar se për të ardhmen e Parkut Rinia duhet të vendosin vetë qytetarët. Demokratët i kanë bërë thirrje edhe forcave opozitare të bashkohen me nismën.
PD shprehet e gatshme të bashkëpunojë me çdo faktor opozitar, pa përjashtim, për të siguruar sa më shpejt nënshkrimet e nevojshme dhe për t’i hapur rrugë referendumit.
Lidhja me zgjedhjet vendore
Partia Demokratike e konsideron këtë proces edhe një mundësi për të konkretizuar bashkëpunimin opozitar përpara zgjedhjeve vendore. Sipas saj, bashkimi duhet të dëshmohet përmes veprimit në terren dhe jo vetëm përmes deklaratave publike.
/gj.m/a.f/
Burimi: ata.gov.al
