Kalo te përmbajtja

Lajme të shpejta, të verifikuara dhe të paanshme

Lajm i fundit
Politikë

60-vjeçari dënohet me 10 vite burgim për sulmin me thikë në Milano

60-vjeçari dënohet me 10 vite burgim për sulmin me thikë në Milano
Foto: albeu.com

Më 3 nëntor 2025, në sheshin Gae Aulenti në zonën e rrokaqiejve të Milanos, një grua 43-vjeçare u sulmua nga pas teksa po i drejtohej vendit të punës. Autori, Vincenzo Lanni, e goditi me thikë drejtuesen e kompanisë Finlombarda, duke e plagosur rëndë me një mjet prerës me teh 23 centimetra të gjatë.

Dënimi i autorit

Për këtë ngjarje, 60-vjeçari është dënuar me 10 vite burg në Milano të Italisë. Në përfundim të gjykimit me procedurë të shkurtuar, gjyqtarja e seancës paraprake në Gjykatën e Milanos, Chiara Valori, e shpalli Lannin fajtor për tentativë vrasjeje me rrethanën rënduese të paramendimit.

Prokurorja Maria Cristina Ria kishte kërkuar më parë dënimin e tij me 12 vite e 2 muaj burg.

Sipas hetimeve, autori nuk e njihte viktimën dhe e kishte përzgjedhur atë krejt rastësisht. Edhe pamjet filmike të ngjarjes ndihmuan në rindërtimin e dinamikës së sulmit.

Sipas mediave italiane, Lanni kishte vuajtur më parë një dënim prej 8 vitesh burg për dy tentativa vrasjeje të kryera në vitin 2015, kur kishte goditur me thikë dy pensionistë në provincën e Bergamos. Pas shlyerjes së atij dënimi, ai ishte liruar pasi ishte vlerësuar se nuk përbënte më rrezikshmëri shoqërore.

Gjendja psikike dhe përgatitja e sulmit

Gjatë hetimeve për ngjarjen e Milanos, ekspertiza psikiatrike konstatoi se 60-vjeçari kishte aftësi të plotë për të kuptuar dhe kontrolluar veprimet e tij në momentin e sulmit, pavarësisht problemeve të tij të shëndetit mendor. Hetuesit zbuluan gjithashtu se ai e kishte blerë thikën vetëm pak ditë para ngjarjes.

Masat e tjera ndaj autorit

Krahas dënimit me burg, gjykata vendosi që pas përfundimit të dënimit Lanni t’i nënshtrohet masës së sigurisë së mbikëqyrjes për tre vjet. Ai u detyrua gjithashtu t’i paguajë viktimës 50 mijë euro si dëmshpërblim paraprak.

Gjendja e viktimës

Avokati i 43-vjeçares, Paolo Cardone, deklaroi se klientja e tij po rikuperohet, por vijon të përballet me pasojat psikologjike të sulmit.

Sipas avokatit, ajo po e merr veten, është gjallë për mrekulli për shkak të vetëm disa centimetrave dhe po ndjek një proces rehabilitimi psikologjik pas traumës.

Ai shtoi se mbërritja e shpejtë e ambulancës atë mëngjes kishte qenë vendimtare për shpëtimin e jetës së gruas.

Motivi i deklaruar

Pas arrestimit, 60-vjeçari kishte deklaruar se synimi i tij ishte të godiste pushtetin ekonomik dhe jo të vriste dikë. Ai kishte pohuar se objektiv i tij ishte një punonjës banke, ku ai vetë kishte punuar më parë dhe nga i cili, sipas tij, ishte larguar padrejtësisht.

Vincenzo Lanni ndodhet në burgun San Vittore në Milano, aty ku ishte edhe në momentin e shpalljes së vendimit.

Burimi: www.albeu.com

Të fundit Të gjitha