Princi George ka dëshmuar talentin e tij në art, duke tërhequr vëmendjen me një ilustrim të një zogut peshkatar, i cili është përfshirë në numrin e veçantë të revistës britanike “Country Life”, të redaktuar nga babai i tij, Princi William.
Vizatimi shumëngjyrësh i zogut është realizuar nga George kur ishte 12 vjeç, ndërsa është publikuar në numrin përkujtimor të revistës, që doli më 11 nëntor. Ky botim i veçantë është përgatitur nga Princi William, i cili ka kaluar gjashtë muaj duke punuar në të.
Talenti i trashëguar në familje
Talenti artistik i George duket se është trashëguar nga nëna e tij, Kate Middleton, dhe gjyshi, Mbreti Charles, të cilët kanë shfaqur prej vitesh interesim për artin dhe pikturën.
Nuk është hera e parë që krijimet e princit të ri bëhen publike. Në Krishtlindjet e vitit 2022, William dhe Kate ndanë një pikturë të detajuar të një dreri, të realizuar nga George. Ndërsa në vitin 2025, Kate publikoi edhe katër portrete familjare të krijuara nga fëmijët e saj gjatë një aktiviteti të përbashkët artistik.
Edhe Princesha e Uellsit ka dëshmuar prirjet e saj artistike. Ajo ka studiuar histori arti në Universitetin e St Andrews në Skoci, ku edhe u njoh me Princin William. Në vitin 2002, Kate kishte realizuar një skicë të qytetit universitar St Andrews, e cila më vonë tërhoqi vëmendjen e admiruesve të familjes mbretërore.
Ndërkohë, Mbreti Charles njihet për pasionin e tij shumëvjeçar për akuarelin, duke realizuar piktura të peizazheve në Zvicër dhe në pronën mbretërore Balmoral në Skoci.
Përmbajtja e numrit special
Numri special i “Country Life” përmban edhe shkrime të Princit William për të ardhmen e zonave rurale, mbrojtjen e natyrës dhe krijimin e kushteve më të mira për gjeneratat e ardhshme. Në të përfshihet edhe një intervistë me Princeshën Kate, e cila flet për fuqinë shëruese të natyrës, si dhe një material për jetën familjare të çiftit mbretëror.
Princi William ka ndarë gjithashtu disa detaje nga jeta e përditshme me fëmijët e tij, George, Charlotte dhe Louis, përfshirë shëtitjet familjare me qentë Orla dhe Otto. Botimi trajton edhe pasionin e tij për futbollin dhe ekipin Aston Villa.
Kryeredaktori i revistës, Mark Hedges, e ka vlerësuar angazhimin e Princit William, duke theksuar përkushtimin e tij ndaj çështjeve mjedisore dhe të ardhmes së komuniteteve rurale./KultPlus.com
Burimi: kultplus.com
