Kalo te përmbajtja

Lajme të shpejta, të verifikuara dhe të paanshme

Lajm i fundit
Kulturë

Kosova fton startup-et shqiptare në Davos 2027

Kosova fton startup-et shqiptare në Davos 2027
Foto: kultplus.com

“House of Kosova” do të rikthehet nga 18 deri më 22 janar 2027 në Davos të Zvicrës, në kuadër të Forumit Ekonomik Botëror. Startup-et, themeluesit e kompanive të teknologjisë dhe partnerët nga Kosova dhe diaspora mund të aplikojnë deri më 22 nëntor.

Thirrja për aplikim dhe kriteret

Kosova po përgatitet për edicionin e tretë të projektit “House of Kosova” në Davos të Zvicrës, këtë herë me fokus të veçantë në teknologji dhe inovacion, njofton albinfo.ch. 

Në kuadër të përgatitjeve për edicionin e vitit 2027, Zyra e Kryeministrit të Republikës së Kosovës ka hapur thirrjen për aplikim, me moton “Your Tech Idea Goes to Davos”, duke ftuar startup-et, themeluesit e kompanive teknologjike dhe partnerët nga Kosova dhe diaspora që të bëhen pjesë e këtij organizimi.

Thirrja u drejtohet kompanive teknologjike që kanë një produkt funksional ose një version fillestar të tij (MVP), kanë dëshmuar përparim në treg dhe kanë lidhje të qartë me Kosovën. Në këtë proces mund të aplikojnë edhe themelues nga diaspora, si dhe kompani ndërkombëtare me lidhje të konsoliduara me Kosovën.

Gjithashtu, ftesa është e hapur për kompani dhe organizata që dëshirojnë ta mbështesin “House of Kosova” përmes financimit, teknologjisë, pajisjeve apo shërbimeve.

Datat dhe afati i aplikimit

Edicioni i tretë i “House of Kosova” do të mbahet nga 18 deri më 22 janar 2027, në Davos, gjatë javës së takimit vjetor të Forumit Ekonomik Botëror, me temën “House of Kosova: House of Tech”.

Afati i fundit për aplikim është 22 nëntori 2026, ndërsa të interesuarit mund të aplikojnë përmes faqes zyrtare: https://houseofkosova.com/open-call/

Edicionet e mëparshme

“House of Kosova” u hap për herë të parë në Davos në janar të vitit 2025. Gjatë asaj jave, Kosova nënshkroi marrëveshjen e tregtisë së lirë me shtetet e EFTA-s, ndërsa aktiviteti “Nata e Kosovës” bashkoi udhëheqës, diplomatë dhe përfaqësues të komunitetit shqiptar në Zvicër.

Në edicionin e vitit 2026, në këtë hapësirë u organizuan panele diskutimi për inteligjencën artificiale, energjinë, ndërtimin dhe demokracinë, me pjesëmarrjen e kryeministrit Albin Kurti dhe mysafirëve ndërkombëtarë.

Programi dhe folësit për edicionin e vitit 2027 pritet të bëhen të ditur në vijim, ndërsa kërkesat për ftesa për pjesëmarrje do të hapen së shpejti./Albinfo.ch

Burimi: kultplus.com

Të fundit Të gjitha