Këngëtarja shqiptare me famë botërore, Dua Lipa, ka prezantuar përzgjedhjen e radhës për Klubin e Librit Service95, duke vënë në qendër romanin “White Teeth” të shkrimtares britanike Zadie Smith.
Përmes një postimi në rrjetet sociale, Dua Lipa ka ndarë vlerësimin e saj për këtë vepër, të cilën e cilëson si një nga librat më të rëndësishëm të letërsisë bashkëkohore, që vazhdon të ndikojë në botën letrare edhe më shumë se dy dekada pas botimit.
Një debutim që la gjurmë
I botuar në vitin 2000, “White Teeth” shënoi debutimin letrar të Zadie Smith dhe u prit me vëmendje të madhe nga kritika dhe lexuesit. Romani është përshkruar si një sagë shumëgjeneracionale, plot humor dhe ngjarje, që pasqyron Londrën multikulturore të shekullit XX përmes historive të dy familjeve, Iqbal dhe Jones.
Personazhet dhe historitë e tyre
Ngjarja nis me Archie Jonesin, një burrë në moshë të mesme, i cili pas dështimit të martesës së parë përpiqet të nisë një jetë të re. Ai takohet me Clarën, një vajzë 19-vjeçare me prejardhje xhamajkane, në një festë në veri të Londrës. Ndërkohë, historia e mikut të tij, Samad Iqbal, dhe familjes së tij sjell në pah përplasjet mes brezave, traditës dhe ndryshimeve shoqërore.
Në qendër të romanit janë edhe personazhet e brezit të ri, binjakët Millat dhe Magid Iqbal, si dhe Irie Jones, të cilët sfidojnë bindjet e prindërve të tyre dhe përballen me pyetjet rreth identitetit, përkatësisë dhe vendit që zënë në shoqëri.
Vlerësimi i Dua Lipës
Në prezantimin e saj, Dua Lipa vlerëson mënyrën se si Zadie Smith ndërthur shumëllojshmërinë e gjuhës së rrugëve të Londrës me temat e identitetit, komunitetit dhe ndikimit të trashëgimisë familjare në formimin e individit.
Përmes Service95 Book Club, Dua Lipa vazhdon të promovojë letërsinë dhe të prezantojë autorë e vepra që nxisin diskutime për kulturën, shoqërinë dhe përvojat njerëzore./KultPlus.com
A post shared by Service95 Book Club with Dua Lipa (@service95bookclub)
Burimi: kultplus.com
