France Football, revista që organizon Topin e Artë, ka nisur një hetim për baste të dyshimta të vendosura në platformën e kriptomonedhave Polymarket. Dymbëdhjetë llogari arritën të parashikonin saktë pesë vendet e para të përzgjedhjes së këtij viti dhe siguruan fitime prej gati 200,000 dollarësh, pasi kishin investuar më shumë se 264,000 dollarë.
Sipas një investigimi të medias franceze Upside, këto llogari u krijuan mes 1 dhe 20 tetorit dhe shfaqën mënyra shumë të ngjashme veprimi. Kjo ka shtuar dyshimet se ato mund të kontrolloheshin nga i njëjti person ose nga një grup i organizuar që mund të kishte siguruar informacion konfidencial përpara publikimit zyrtar të rezultateve.
Renditja e parashikuar saktë
Harry Kane u shpall fitues i Topit të Artë, i ndjekur nga Kylian Mbappe, Lamine Yamal, Rodri dhe Lionel Messi. Pikërisht kjo ishte renditja e parashikuar nga llogaritë e dyshuara në Polymarket. Parashikimet nuk u kufizuan vetëm te emri i fituesit.
Bastet përfshinin edhe pozicionet e sakta të lojtarëve në klasifikim dhe të pesë rezultatet përputheshin me renditjen përfundimtare. Të dhënat e publikuara nga Upside tregojnë se për skenarë të ndryshëm të lidhur me zgjedhjet u vunë gjithsej më shumë se 264,000 dollarë. Fitimi arriti në pothuajse 200,000 dollarë, ekuivalente me rreth 149,000 funte.
Hetimi evidentoi se gjatë muajit tetor u regjistruan 12 llogari. Shtatë prej tyre nuk u përfshinë në asnjë treg tjetër bastesh, ndërsa gjashtë vendosën bastin e parë vetëm 15 minuta pas krijimit.
Ngjashmëria e sjelljes mes llogarive ka ngritur dyshime të mëtejshme për një lidhje të mundshme mes tyre, edhe pse ende nuk është provuar se të gjitha drejtoheshin nga i njëjti person. Njëra prej llogarive vuri fillimisht bast për fitoren e Kane dhe shiti më pas një pjesë të pozicionit, pasi vlera e tij u rrit. Fondet u përdorën më tej për baste mbi renditje të veçanta, përfshirë vendosjen e Yamal në vendin e tretë.
Gjurmët financiare dhe hetimi
Mes 12 llogarive, njëra dallohet sepse ishte e vetmja që parashikoi të pesë pozicionet në rendin e duhur. Më 1 tetor, ajo vendosi bastin e parë për Kane si fitues dhe gjatë javëve pasuese shtoi edhe pozicione të tjera. Në total, investimi për këto pesë parashikime ishte rreth 14,000 dollarë. Studiuesit ndoqën gjithashtu gjurmët e lëvizjeve financiare të lidhura me këto llogari.
Disa transaksione çuan drejt llogarive të tjera, ndërsa një pagesë u lidh me platformën financiare franceze Deblock. Upside deklaroi se, pasi mori të dhënat e transaksionit, Deblock mundi të identifikonte një person të lidhur me njërën prej llogarive. Identiteti i këtij personi nuk është bërë publik.
Rezultatet e investigimit iu dërguan France Football nga Upside. Organizatorët e Topit të Artë konfirmuan se kanë nisur hetimet dhe se për çështjen duhet të njoftohet edhe policia franceze. Pika kryesore e verifikimit është nëse personat që vendosën bastet kishin akses në të dhëna konfidenciale për renditjen përfundimtare përpara ceremonisë.
France Football ka deklaruar më herët se vetëm një numër shumë i kufizuar personash e dinë emrin e fituesit përpara ndarjes së çmimit. Për këtë arsye, saktësia e pazakontë e parashikimeve ka tërhequr vëmendje të veçantë. Deri tani nuk ka prova për rrjedhje informacioni dhe nuk dihet se kush fshihet pas llogarive të dyshuara.
Megjithatë, fakti që disa llogari investuan shuma të mëdha në një rezultat tepër specifik dhe më pas qëlluan saktë të pesë pozicionet ka hapur pikëpyetje serioze për mbrojtjen e informacionit dhe konfidencialitetin e procesit të votimit për një prej çmimeve më të rëndësishme individuale në futboll.
Burimi: www.albeu.com
