Mes të paktën 69 personave që humbën jetën në aksidentin e rëndë hekurudhor në Spanjë ishte edhe Dr. Marta Shahbazi, shkencëtare dhe drejtuese e një grupi kërkimor në Universitetin e Kembrixhit.
Shahbazi udhëtonte në një nga dy trenat që u përplasën pranë Urda, në jug të Madridit.
Vdekja e Marta Shahbazit
Vdekja e saj u konfirmua nga Laboratori i Biologjisë Molekulare i Këshillit të Kërkimeve Mjekësore (MRC LMB) në Kembrixh. Ajo ishte profesore e asociuar në Universitetin e Kembrixhit dhe anëtare e Institutit të Qelizave Staminale të universitetit.
Instituti spanjoll CiMUS reagoi ndaj vdekjes së saj, duke e përshkruar Shahbazin si një “kërkuese e re të jashtëzakonshme”.
“Marta ishte një shkencëtare e talentuar, drejtuese e një grupi kërkimor në Laboratorin e Biologjisë Molekulare të MRC-së dhe profesore e asociuar në Institutin e Qelizave Staminale të Universitetit të Kembrixhit,” tha instituti në një mesazh.
Specializimi i saj ishte biologjia e qelizës, ndërsa puna shkencore e Shahbazit kishte dhënë një kontribut të rëndësishëm në kërkimin mbi zhvillimin e hershëm njerëzor. Për këtë punë, ajo ishte nderuar me një çmim nga Shoqëria Spanjolle për Biologjinë e Zhvillimit.
Çmimi do të dorëzohej në konferencën e shoqërisë, e planifikuar të mbahej në El Rompido, në Andaluzinë jugperëndimore. Përpara se vdekja e saj të konfirmohej, MRC LMB kishte njoftuar se Shahbazi ishte në një nga trenat e përfshirë në aksident, por nuk dihej se ku ndodhej.
Shahbazi kishte përfunduar doktoraturën në Qendrën Spanjolle Kombëtare për Kërkimin e Kancerit. Pas kësaj, ajo filloi punën si kërkuese postdoktorale në Universitetin e Kembrixhit dhe iu bashkua Laboratorit të Biologjisë Molekulare në vitin 2020.
Aksidenti hekurudhor pranë Urda
Aksidenti ndodhi më 28 tetor, kur një tren me shpejtësi të lartë i operuar nga kompania shtetërore Renfe u përplas me pjesën e pasme të një treni të ndalur të operuar nga Iryo.
Në momentin e përplasjes, më shumë se 540 persona ndodheshin në të dy trenat. Sipas bilancit paraprak, të paktën 69 prej tyre humbën jetën.
Esther Padilla, zëdhënëse e qeverisë së Castilla-La Mancha, tha se treni i Iryo-s mbante 146 pasagjerë dhe një foshnjë, ndërsa në trenin e Renfe-s udhëtonin 397 persona.
Përmasat e aksidentit e kanë renditur atë ndër tragjeditë më të rënda hekurudhore në historinë moderne evropiane dhe e kanë bërë incidentin më vdekjeprurës të këtij lloji në Spanjë që nga viti 2013. Autoritetet spanjolle shpallën tre ditë zie kombëtare për nder të viktimave.
Burimi: www.albeu.com