Një aerodrom ushtarak në Krime është kthyer në një qendër për nisjen e dronëve.
Aerodromi Hvardiyske, i vendosur në zemër të gadishullit ukrainas të Krimesë, të pushtuar nga Rusia, u identifikua fillimisht si pikë nisjeje për dronë sulmues në mars të vitit 2025 dhe tani përdoret pothuajse çdo ditë për sulme, sipas ushtrisë ukrainase. Baza njihet me emrin Gvardeiskoye në rusisht.
Një imazh i marrë më 11 tetor nuk tregon asnjë avion ushtarak, por zbulon një infrastrukturë të re më të gjerë, për të cilën vëzhguesit thonë se lidhet me nisjen e dronëve nga kjo bazë ajrore e epokës sovjetike.
Transformimi i bazës Hvardiyske ka ngritur pyetje se përse Kievi nuk ka arritur ta çaktivizojë këtë objekt me dronë sulmues dhe raketa.
Ukraina ka goditur shpesh depot ruse të dronëve dhe objektet e nisjes së tyre në Krime, përfshirë ato në Kepin Çauda, në juglindjen e largët të gadishullit, si dhe pranë Balaklavës, ku një sulm thuhet se e çaktivizoi objektin. Hvardiyske është goditur nga dronët ukrainas, por dëmet kanë qenë minimale.
Arsyet e rezistencës së bazës Hvardiyske
Një banor i Krimesë dhe ish-oficer i ushtrisë ukrainase foli për Shërbimin e REL-it për Krimenë, duke kërkuar të mbetej anonim, lidhur me arsyet se përse Ukraina ende nuk ka arritur ta çaktivizojë qendrën e madhe Hvardiyske të dronëve.
“Sipas mendimit tim, arsyeja kryesore është se operacionet me dronë atje janë të shpërndara në pjesë të ndryshme të bazës ajrore”, tha ai. “Pika e nisjes ndodhet në një vend, zona e mirëmbajtjes në një tjetër, ndërsa depot në një vend tjetër”.
“E gjithë kjo është infrastrukturë relativisht e thjeshtë, që mund të rikthehet lehtësisht në funksion, dhe një pjesë e saj ndodhet krejtësisht në zonë të hapur”, shtoi ai.
Në imazhin satelitor të 11 tetorit, të siguruar nga REL-i, shihen dhjetëra objekte të paidentifikuara, të vendosura disa metra larg njëra-tjetrës në një zonë të hapur me bar, në cepin jugperëndimor të bazës ajrore.
Ish-oficeri i Forcave të Armatosura të Ukrainës i tha REL-it se një objekt nëntokësor i magazinimit, i ndërtuar nga sovjetikët për të ruajtur municionet e aeroplanëve dhe që ndodhet rreth 15 kilometra nga baza Hvardiyske, ka të ngjarë të përdoret për ruajtjen në sasi të mëdha të dronëve sulmues që nisen nga baza ajrore.
“Ka shumë gjasa që Shahedët mund të jenë fshehur atje”, tha ai për REL-in, duke spekuluar se depërtimi në një hapësirë të tillë të fortifikuar magazinimi “ndoshta është i pamundur, edhe me raketat [e Ukrainës]”.
Një arsye tjetër se përse baza Hvardiyske mund të jetë objektiv më i vështirë për planifikuesit ukrainas të sulmeve është vendndodhja e saj në qendër të Krimesë, një gadishull që tani është i mbushur me sisteme të mbrojtjes ajrore.
Ndryshe nga pikat e nisjes në bregdet, të cilave mund t’u afrohesh nga deti, dronët ukrainas që shënjestrojnë bazën Hvardiyske “duhet të fluturojnë rreth 100 kilometra mbi tokë për të goditur këtë objekt, ku gjasat për t’u rrëzuar janë më të mëdha”, tha burimi.
Fotografi nga arkivi e dronëve Shahed të ruajtur në hangarë në rajonin rus të Orjollit. Këta dronë sulmues me rreze të gjatë veprimi, të dizajnuar nga Irani, janë përdorur gjerësisht nga Rusia për të goditur objektiva në Ukrainë, teksa Moska prodhon edhe versione të saj.
Historiku i bazës ajrore Hvardiyske
Baza ajrore Hvardiyske shërbeu si bazë e aviacionit detar sovjetik dhe më pas atij ukrainas.
Pas aneksimit të Krimesë nga Rusia, objekti u mor nën kontroll nga Forcat Ajrore dhe Hapësinore të Rusisë, të cilat vendosën në këtë bazë bombarduesit Su-24M dhe aeroplanët sulmues Su-25SM, deri në shndërrimin e saj në një qendër për dronët./REL
Burimi: top-channel.tv
