Numri i jetëve të humbura nga një shpërthim i fuqishëm në Elbasan mund të arrijë në dy, pasi ekipet e kërkim-shpëtimit në terren dyshojnë për një 69-vjeçar nën rrënoja.
Viktimat dhe të lënduarit
Fatkeqësisht, nga shpërthimi në pallatin 5-katësh në lagjen Çlirimi të Elbasanit humbi jetën një grua e moshuar, ndërsa 10 persona u asfiksuan nga tymi.
Kërkimet dhe evakuimi
Kryebashkiaku Gledian Llatja tha se kërkimet për personin që rezulton i zhdukur vijojnë ende nga strukturat e specializuara. Ai deklaroi se të gjitha familjet janë evakuuar.
“Gjatë gjithë ditës së sotme, strukturat e emergjencës së Bashkisë së Elbasanit, në bashkëpunim me Emergjencat Civile, kanë qenë në terren në menaxhim të situatës. Ka qenë situatë e rëndë, ka pasur shembje të strukturës, të katit të katërt dhe katit të tretë. Situata është mbajtur në kontroll, zjarri është fikur. Po vazhdojnë kërkimet nga strukturat e specializuara, janë 16 punonjës në terren. Strukturat e bashkisë janë këtu për të menaxhuar situatën. Familjet janë evakuuar. Pjesa më e madhe e tyre janë strehuar tek të afërmit dhe një pjesë e tyre janë strehuar në konviktet e studentëve në Elbasan. Sipas vlerësimeve të para të inxhinierëve tonë, pallati është i pabanueshëm”, theksoi ai.
Burimi: tirananews.al
