Kryeministri i Kosovës, Albin Kurti, ka pranuar Raportin e Komisionit Evropian për Kosovën për vitin 2026, nga shefi i Zyrës së Bashkimit Evropian në Kosovë, ambasadori Dirk Schuebel.
Pas takimit dypalësh, Kurti dhe Schuebel mbajtën një konferencë të përbashkët për media, ku kryeministri foli për vlerësimet e raportit, progresin e vendit në fusha të ndryshme dhe sfidat në procesin e integrimit evropian.
Vlerësimet e raportit dhe progresi i vendit
Kurti tha se raporti nuk evidenton kthim prapa në asnjë fushë dhe se Kosova ka shënuar përparim në luftën kundër krimit të organizuar, reformën e administratës publike, drejtësi, liri dhe siguri, si dhe në disa fusha të tjera. Ai veçoi edhe vlerësimin më të mirë për luftën kundër krimit të organizuar, rritjen e bashkëpunimit policor me vendet evropiane dhe përafrimin e plotë të politikës së jashtme dhe të sigurisë së Kosovës me atë të BE-së.
Kryeministri theksoi se periudha e raportimit është karakterizuar nga ngërçi politik dhe bllokada institucionale, të cilat, sipas tij, kanë ngadalësuar ritmin e reformave dhe kanë vonuar miratimin e disa ligjeve dhe marrëveshjeve të rëndësishme.
Aplikimi për anëtarësim në BE
Megjithatë, Kurti ritheksoi se anëtarësimi në Bashkimin Evropian mbetet prioritet strategjik i Kosovës dhe kërkoi që vendit t’i dorëzohet sa më parë pyetësori për aplikimin për anëtarësim, si hap drejt marrjes së statusit të vendit kandidat dhe hapjes së negociatave.
Ai rikujtoi se Kosova ka aplikuar për anëtarësim në BE më 15 dhjetor 2022 dhe se, gati katër vjet më vonë, vazhdon të jetë i vetmi vend në Ballkanin Perëndimor pa statusin e vendit kandidat.
Rezultatet ekonomike dhe shërbimet publike
Në fjalën e tij, Kurti përmendi edhe disa nga rezultatet e evidentuara në raport, përfshirë rritjen ekonomike prej 5.4 për qind në tremujorin e parë të vitit, rritjen e të hyrave buxhetore me 8.3 për qind, zgjerimin e shërbimeve në platformën e-Kosova në mbi 330 shërbime, si dhe mbulimin e mbi 390 mijë fëmijëve me shtesa.
Ai foli edhe për progresin në arsim, energji, mjedis dhe tregti, duke theksuar se Kosova ka avancuar në përafrimin me standardet evropiane. Ndërkaq, sa i përket luftës kundër korrupsionit, pranoi se rezultatet në rastet e nivelit të lartë ende nuk janë në nivelin e duhur, duke theksuar se Qeveria do të ndërmarrë hapa për forcimin e institucioneve përgjegjëse.
Ligjet e planifikuara dhe hapat e ardhshëm
Kurti bëri të ditur se Qeveria synon të miratojë një sërë ligjesh të rëndësishme, përfshirë ato për sistemin e drejtësisë, punën, sigurinë në punë, komunikimet elektronike dhe sigurinë kibernetike, si dhe prokurimin publik.
Në përfundim, ai tha se Kosova do të vazhdojë me reformat, duke theksuar se ato janë të rëndësishme para së gjithash për qytetarët dhe për avancimin e vendit drejt anëtarësimit në Bashkimin Evropian./KultPlus.com
Burimi: kultplus.com
