E shtuna mbrëmje solli një atmosferë të veçantë në Lezhë. Kisha Katolike organizoi Festën e të Gjithë Shenjtorëve, një veprimtari që bashkoi fëmijë, përfaqësues të klerit katolik dhe shumë qytetarë, duke i dhënë qytetit gjallëri dhe ngjyra.
Parada e fëmijëve drejt Katedrales së Shën Nikollit
Të veshur si shenjtorë dhe të shoqëruar nga përfaqësues të klerit katolik e nga një numër i madh qytetarësh, fëmijët marshuan nga qendra e qytetit për në Katedralen e “Shën Nikollit”, ku vijuan kremtimet fetare.
Famullitari i Katedrales së Lezhës, Dom Frano Çivljak, u shpreh se kjo është një festë kushtuar të gjithë atyre që kanë jetuar në shenjtëri. Ai theksoi se përmes këtij aktiviteti synohet të përcillet mesazhi i festës, ndryshe nga mënyrat e frikshme me të cilat një pjesë e njerëzve zgjedhin ta shënojnë këtë ditë.
Një mbrëmje festive për të gjithë qytetin
Festa e të Gjithë Shenjtorëve në Lezhë vazhdoi deri në orët e vona të mbrëmjes. Pas ritualit fetar në Katedrale, fëmijët u argëtuan me muzikë dhe lojëra të ndryshme, duke e shndërruar këtë kremtim në një mbrëmje festive për të gjithë qytetin.
Burimi: shqiptarja.com