Kombëtarja shqiptare rikthehet në fushë për një nga sfidat më të rëndësishme të këtij edicioni të “UEFA Nations League”. Kuqezinjtë presin Finlandën sonte në stadiumin “Arena Kombëtare”, në një përballje që mund të ndikojë drejtpërdrejt në garën për vendin e parë në Ligën C, Grupin 1. Takimi do të nisë në orën 20:45 dhe do të gjykohet nga arbitri portugez S. Pinheiro.
Shqipëria në garë për kreun e grupit
Shqipëria e drejtuar nga Rolando Maran e fillon këtë përballje si lidere e grupit, me 9 pikë të grumbulluara. Pas saj renditen Bjellorusia dhe Finlanda, me nga 7 pikë secila, ndërsa San Marino mbyll klasifikimin pa asnjë pikë.
Kuqezinjtë kanë përpara dy përballje vendimtare gjatë këtij muaji, sonte dhe më 15 nëntor, kundër dy rivalëve të drejtpërdrejtë për kreun e grupit. Një rezultat pozitiv ndaj finlandezëve do të ishte hap i rëndësishëm drejt objektivit.
Formacioni i parashikuar
Sa i përket formacionit, Maran pritet të përdorë skemën 4-3-3. Në portë parashikohet të jetë Etrit Berisha, ndërsa reparti defensiv pritet të përbëhet nga Mario Mitaj në të majtë, Berat Gjimshiti dhe Ardian Ismajli në qendër, si dhe Elseid Hysaj në krahun e djathtë.
Në mesfushë pritet të rreshtohen Ylber Ramadani në rolin e shkatërruesit përpara mbrojtjes, me Qazim Laçin dhe Kristjan Asllanin në mbështetje dhe më të avancuar. Ndërkohë, treshja ofensive pritet të formohet nga Pilo në krahun e majtë, Muçi në të djathtë dhe Rey Manaj në majën e sulmit.
Ky formacion synon ekuilibrin mes sigurisë në prapavijë dhe forcës sulmuese, në një mbrëmje ku Shqipëria ka nevojë për mbështetjen e tifozëve dhe tri pikë shumë të vlefshme.
Burimi: telesport.al
