TIRANË, 7 nëntor/ATSH/ Eksperienca dhe metodologjia e një prej klubeve më të njohura të futbollit europian, AC Milan, do të prezantohen në Shqipëri përmes Seminarit të Katërt Ndërkombëtar për Trajnerët e Portierëve, që organizohet nga Federata Shqiptare e Futbollit (FSHF).
I ftuari special: Luigi Ragno
I ftuar special i këtij edicioni do të jetë specialisti italian Luigi Ragno, i cili ka mbi 15 vite eksperiencë në strukturat e klubit AC Milan. Ai do të ndajë me trajnerët shqiptarë dhe ata nga rajoni njohuritë e tij mbi përgatitjen dhe zhvillimin e portierëve, duke prezantuar edhe metodologjitë e përdorura në futbollin europian.
Data, orari dhe pjesëmarrësit
Seminari do të zhvillohet më 23 nëntor 2026, nga ora 10:00 deri në 15:00, dhe do të jetë i hapur për trajnerët e portierëve të të gjitha niveleve nga Shqipëria, Kosova, Maqedonia e Veriut dhe Mali i Zi.
Synimi i seminarit
Për të katërtin vit radhazi, FSHF organizon këtë seminar në kuadër të programit për edukimin dhe kualifikimin e trajnerëve, me synimin për të sjellë në Shqipëri përvojat dhe praktikat bashkëkohore të futbollit ndërkombëtar, si dhe për të nxitur shkëmbimin e njohurive mes specialistëve të kësaj fushe.
/gj.m/r.e/
Burimi: ata.gov.al
