Kapiteni i Zurichut, Lindrit Kamberi, e ka vendosur Fadil Vokrrin në krye të listës së tij me pesë lojtarët më të mirë në historinë e futbollit të Kosovës. Në vendin e dytë ai ka zgjedhur sulmuesin Vedat Muriqi, ndërsa të tretin ish-kapitenin Amir Rrahmani.
Edon Zhegrova zë vendin e katërt në renditjen e Kamberit. Pesëshen e mbyll bashkëlojtari i tij te Zurichu, Bledian Krasniqi, i cili ka luajtur një ndeshje miqësore me fanellën e Kosovës.
Renditja u bë në një video që gazeta zvicerane “Blick” ka publikuar nga ambientet e Zurichut. Videoja ishte realizuar më herët, kur Kamberi ishte pyetur për pesë emrat më të mirë të futbollit kosovar.
Debutimi i Kamberit me Kosovën
Kamberi debutoi për Kosovën të shtunën, duke luajtur gjatë gjithë ndeshjes që përfundoi 0-0 ndaj Izraelit. Ai pati një paraqitje pozitive dhe ndihmoi që porta të mbetej e paprekur, ndonëse Kosova luajti me një futbollist më pak prej minutës së 66-të.
Ai pritet të jetë titullar edhe të martën në Dublin, në ndeshjen kundër Irlandës.
Burimi: www.albeu.com
