Moderatorja e njohur Fjoralba Ponari ka ndarë një rrëfim emocional teksa ka folur për humbjen e nënës dhe dhimbjen që vazhdon ta shoqërojë edhe sot.
Dhimbja e humbjes
Duke kujtuar të ëmën, Ponari e ka krahasuar dhimbjen e humbjes me një gur që mbetet përgjithmonë në zemër. Sipas saj, secili e përjeton ndryshe mungesën e një njeriu të dashur. Disa e ndiejnë këtë peshë gjithnjë e më të rëndë, ndërsa të tjerë mësojnë të jetojnë me të, pa e harruar personin që kanë humbur.
“Humbja e çfarëdo lloj njeriu të afërt është e rëndë dhe lë gjurmë, aq më shumë humbja e nënës”, u shpreh Ponari gjatë emisionit “Goca dhe Gra”.
Ëndrra me nënën
Një nga momentet më të ndjera të rrëfimit ishte kur moderatorja tregoi për një ëndërr me nënën e saj të ndjerë. Ajo zbuloi se për pothuajse një vit nuk e kishte parë asnjëherë në ëndërr, derisa një natë kishte përjetuar një moment që e kishte ndihmuar të çmallej me të.
“Për thuajse një vit nuk e kam parë as edhe një natë në ëndërr. Pastaj pata një moment që më vizitoi, u çmallëm me të. Ndoshta mora edhe ato fjalët që zemra ime lëngonte t’i dëgjonte prej saj. Do të doja të më vizitonte më shpesh. Kjo është forma alternative”, rrëfeu moderatorja.
Fjoralba tregoi se kjo ëndërr kishte pasur një domethënie të veçantë për të, pasi i kishte krijuar ndjesinë e një takimi me nënën dhe mundësinë për të përjetuar sërish afërsinë e saj.
Megjithatë, moderatorja u shpreh se nuk mund ta dinte nëse ishte thjesht një përjetim i krijuar nga mendja apo diçka që ajo e ndiente si një vizitë të vërtetë.
“Ndoshta është një fantazi e mendjes sime, ndoshta vjen vërtet e më viziton”, tha ajo.
Përmes këtij rrëfimi, Fjoralba Ponari tregoi se, pavarësisht kalimit të kohës, mungesa e nënës mbetet pjesë e përditshmërisë së saj, ndërsa kujtimet dhe ëndrrat janë një mënyrë për ta ndier sërish pranë.
Burimi: www.kosovarja-ks.com
