Ndryshimi ligjor i emrit
Vivienne, vajza e aktorëve të njohur Angelina Jolie dhe Brad Pitt, ka hequr zyrtarisht mbiemrin e babait. Gjykata e Los Angeles e ka miratuar kërkesën e saj për ndryshimin ligjor të emrit, duke vendosur që të mbajë vetëm mbiemrin e nënës.
Emri i saj ligjor tani është Vivienne Marceline Jolie, në vend të Vivienne Marcheline Jolie-Pitt.
E 18-vjeçarja e kishte paraqitur kërkesën për ndryshimin e emrit më 20 korrik, vetëm disa ditë pasi kishte festuar ditëlindjen së bashku me vëllain e saj binjak, Knox. Në dokumentet gjyqësore, Vivienne kishte përmendur arsye personale për vendimin, pa dhënë më shumë detaje.
Megjithatë, ajo kishte filluar ta përdorte publikisht mbiemrin Jolie që prej më shumë se dy vitesh. Në vitin 2024, emri i saj u shfaq si Vivienne Jolie në programin e muzikalit The Outsiders në Broadway, ku kishte bashkëpunuar me nënën e saj.
Vëllezërit dhe motra
Vivienne nuk është e vetmja nga fëmijët e ish-çiftit që ka vendosur të largohet nga mbiemri i babait. Edhe motra e saj, Zahara, e ka ndryshuar zyrtarisht emrin në Zahara Marley Jolie, ndërsa Shiloh dhe Maddox e kanë hequr gjithashtu mbiemrin Pitt.
Ndërkohë, për Knox nuk ka konfirmim nëse ka nisur procedurat ligjore për ndryshimin e emrit, megjithëse së fundmi është shfaqur publikisht pa mbiemrin e babait. Pax, nga ana tjetër, vazhdon të mbajë mbiemrin Pitt.
Vendimi i Vivienne vjen në një kohë kur marrëdhëniet mes Angelina Jolie dhe Brad Pitt kanë qenë për vite në qendër të vëmendjes mediatike, veçanërisht pas ndarjes së tyre dhe betejave të gjata ligjore.
Burimi: shqiptarja.com
