Kalo te përmbajtja

Lajme të shpejta, të verifikuara dhe të paanshme

Lajm i fundit
Showbiz

Portret i rrallë i Michael Jacksonit del në ankand me çmim deri në 500 mijë euro

Portret i rrallë i Michael Jacksonit del në ankand me çmim deri në 500 mijë euro
Foto: bordo.al

Një vepër artistike e rrallë, që paraqet një portret të Michael Jackson-it në një nga periudhat më të rëndësishme të karrierës së tij, do të dalë në ankand më 26 nëntor në Francë. Piktura, e realizuar në vitin 1989, pritet të tërheqë vëmendjen e koleksionistëve dhe admiruesve të Mbretit të Pop-it, me një vlerë të vlerësuar nga 300 mijë deri në 500 mijë euro.

Vepra mban autorësinë e artistit australian Brett-Livingstone dhe do të ofrohet për shitje nga shtëpia e ankandeve Aguttes, në kuadër të një eventi të kushtuar kulturës pop dhe objekteve koleksionistike.

Një portret i rrallë formal

Sipas ekspertit të kulturës pop, Arthur Perault, ky portret ka një veçori të jashtëzakonshme: konsiderohet si rasti i vetëm kur Michael Jackson ka pranuar të pozojë për një portret formal gjatë gjithë karrierës së tij.

Në pikturë, këngëtari paraqitet i ulur, i veshur me një xhaketë të kuqe dhe me duart e vendosura mbi një libër të mbyllur. Ky objekt ka një kuptim të veçantë, pasi besohet se përmban ide krijuese, vizatime dhe tekste këngësh të artistit.

Neverland dhe bota personale

Kompozimi përfshin gjithashtu elemente të frymëzuara nga Neverland, duke ndërthurur imazhin e superyllit me botën e tij personale, më pak të njohur për publikun. Pikërisht këtë kontrast Perault e konsideron një nga aspektet më interesante të veprës, të cilën e përshkruan si një ndërthurje mes figurës publike dhe ndjeshmërisë së brendshme të Jackson-it.

Historia e pikturës

E përfunduar në dhjetor të vitit 1989, në periudhën mes albumeve të suksesshme “Bad” dhe “Dangerous”, piktura u prezantua për herë të parë në publik në Beverly Hills, në janar të vitit 1990. Në atë kohë, raportimet mediatike pretendonin se ajo ishte blerë për 2.1 milionë dollarë.

Pas kësaj, vepra u largua kryesisht nga vëmendja publike. Një nga ekspozimet e saj të rralla ndodhi në vitin 2009, në Harlem, pak pas vdekjes së këngëtarit.

Tani, pas disa dekadash, portreti rikthehet në ekspozim publik përpara ankandit, duke u dhënë koleksionistëve mundësinë të bëhen pronarë të një prej paraqitjeve artistike më të veçanta të Michael Jackson-it.

Burimi: bordo.al

Të fundit Të gjitha