Prej kohësh në qendër të thashethemeve për jetën e tij sentimentale, Paolo Bonolis ka vendosur të flasë vetë dhe të sqarojë gjithçka. Moderatori italian ka konfirmuar publikisht lidhjen me Carola Moronin, sipërmarrësen 32-vjeçare nga Roma, me të cilën ishte fotografuar së fundmi në Londër.
Mesazhi i Bonolis-it në rrjetet sociale
Përmes një postimi të gjatë në rrjetet sociale, Bonolis ka ndarë me ndjekësit një mesazh të pazakontë për të, duke treguar se po kalon një periudhë të qetë dhe të lumtur në jetën personale, së bashku me fëmijët dhe personin e ri në krah të tij.
“Po frekuentoj një grua që më pëlqen shumë, Carola dhe po kaloj një kohë vërtet të këndshme me të”, shkruan moderatori, duke mos lënë më vend për dyshime rreth raportit të tyre.
Bonolis theksoi se ky është një moment veçanërisht i bukur për të dhe fëmijët e tij, pavarësisht përpjekjeve të vazhdueshme për të krijuar zhurmë rreth jetës së tij private.
Marrëdhënia me ish-bashkëshorten
Në të njëjtin reagim, moderatori ka zgjedhur të ndalë edhe aludimet për marrëdhënien me ish-bashkëshorten, Sonia Bruganelli. Ai bëri të qartë se mes tyre nuk ka konflikte apo tensione dhe se vazhdojnë të ruajnë një raport të mirë, si në jetën familjare, ashtu edhe në atë profesionale.
Madje, Bonolis zbuloi se Sonia ka një partner që ai e vlerëson, ndërsa edhe ajo ka simpati për Carolën.
“I duam fëmijët tanë, jetojmë për ta, jemi të lumtur dhe vazhdojmë të bashkëpunojmë në paqe, edhe në punë. Nuk ka mistere, tensione apo sekrete të fshehta për t’u zbuluar”, u shpreh ai.
Ironia si përgjigje
Në fund, moderatori nuk la pa përdorur as ironinë e tij karakteristike, duke iu drejtuar atyre që kërkojnë vazhdimisht histori të bujshme pas jetës së tij private. Ai rekomandoi me humor librat e fantazisë, veçanërisht serinë “The Dark Tower” të Stephen King, duke lënë të kuptohet se historitë e sajuara duhen kërkuar në letërsi dhe jo në jetën e tij.
Burimi: bordo.al
